IPLના એક સુવર્ણ યુગનો આવ્યો અંત: આ પહેલી એવી IPL હશે જેમાં ભારતના 3 ધુરંધરો ધોની-રોહિત-વિરાટની નહીં જોવા મળે કેપ્ટનશીપ

IPL 2024: મહાસંગ્રામ શરૂ થાય તે પહેલા જ ચાહકોને નિરાશ કરનારા સમાચાર સામે આવ્યા છે. તમામ ક્રિકેટ પ્રેમીઓના પ્રિય કેપ્ટન(IPL 2024) એમએસ ધોનીએ ચેન્નાઈ સુપર કિંગ્સની કેપ્ટનશીપ છોડવાની જાહેરાત કરી છે.

માહીએ ઈન્ડિયન પ્રીમિયર લીગની 17મી સીઝન માટે CSKની બાગડોર રૂતુરાજ ગાયકવાડને સોંપી હોવાનું સામે આવ્યું છે. ધોનીના નિર્ણય બાદ IPL 2024માં પહેલીવાર કંઈક એવું થશે, જે આ લીગના 16 વર્ષમાં નથી થયું.

IPLમાં આવું પહેલીવાર થશે
IPL 2024ની શરૂઆત પહેલા જ ધોનીએ ફેન્સના દિલ તોડી નાખ્યા છે. માહીની ચતુરાઈ આ સિઝનમાં જોવા નહીં મળે. ઈન્ડિયન પ્રીમિયર લીગના 16 વર્ષના ઈતિહાસમાં આ પ્રથમ વખત બનશે, જ્યારે ધોની, રોહિત કે વિરાટ કોહલીમાંથી કોઈ કેપ્ટનશિપ કરતા જોવા નહીં મળે. આઈપીએલમાં આ પહેલા ક્યારેય બન્યું નથી, જ્યારે આ ત્રણેય મહાન ખેલાડીઓ ટૂર્નામેન્ટમાં માત્ર ખેલાડી તરીકે રમ્યા હોય.

ધોનીએ રુતુરાજને કેપ્ટનશિપ સોંપી
આઈપીએલ 2024ની શરૂઆતના એક દિવસ પહેલા એમએસ ધોનીએ ચેન્નાઈ સુપર કિંગ્સની કમાન રુતુરાજ ગાયકવાડને સોંપી છે. માહીએ તેની કપ્તાનીમાં પાંચ વખત CSK ચેમ્પિયન બનાવ્યું હતું. ગત સિઝનમાં ધોનીએ ફાઈનલ મેચમાં ગુજરાત ટાઈટન્સને હરાવીને ચેન્નાઈને પાંચમી વખત ચેમ્પિયન બનાવ્યું હતું.