કૌભાંડી કરુણેશએ કોરોના કાળમાં સરકાર પાસેથી ગરીબોના નાસ્તા પાણીના નામે એક કરોડ લઈ વ્યાજે ફેરવ્યા

હાલ હત્યાની કોશિશ અને રાયોટિંગના ગુનામાં પોલીસ કસ્ટડીમાં રહેલા કરુણેશ રાણપરીયા (Karunesh Ranpariya) અને તેના સાગરીતો ના રિમાન્ડમાં ચોકાવનારી વિગતો બહાર આવી છે કોરોના કાળમાં ગરીબોને ભોજન આપનાર સંસ્થાઓ બહાર આવી હતી ત્યારે કરુણેશ રાણપરિયાએ (Karunesh Ranpariya) પણ એક ટ્રસ્ટના નામે યુવા ટીમ બનાવીને સેવાઓનું કામ શરૂ કર્યું હતું. પોતાની સેવાના કાર્યો Facebook લાઇવના માધ્યમથી સેવાનું કામ લોકો સમક્ષ મૂકીને સામાજિક સંસ્થાઓ અને આગેવાનો પાસેથી અઢળક ભંડોળ મેળવ્યું હતું.

કોરોના કાળમાં સેવા કરનાર સંસ્થાઓને સરકાર દ્વારા ગ્રાન્ટ આપવામાં આવી હતી અને કરેલા ખર્ચના બિલ મૂકે તેમને યોગ્ય ગ્રાન્ટ ફાળવવામાં આવતી હતી, ત્યારે કરુણેશ રાણપરિયા એ સુરત કલેકટર પાસેથી એક કરોડ જેટલી રકમનો ગ્રાન્ટનો ચેક મેળવ્યો હતો. તેવી વાતનો ખુલાસો પોલીસ તપાસ દરમિયાન થયો છે.

ત્યારબાદ કરુણેશ દ્વારા તેજસ સંઘર્ષના સાથી ભૂખ્યાને ભોજન નામના અલગ અલગ નોંધાયેલા અને ન નોંધાયેલા ગ્રુપ ચાલુ કરીને રકમ ભેગી કરવામાં આવી છે, તે અંગેની તપાસ પોલીસ કરી રહી છે. આટલું જ નહીં કરુણેશ એ સરકારમાંથી મેળવેલી રકમ ધિરાણ કરવાનું લાયસન્સ ન હોવા છતાં કરુણેશે જેમને વ્યાજે આપી હતી. તેમાંથી ઘણી ખરી રકમ રિકવર કરી હોવાની વાત પણ સામે આવી છે.

પોલીસે અદાલતમાં વધુ રિમાન્ડ માંગવા જણાવ્યું હતું કે, કરુણેશએ લોકડાઉનમાં મજૂરોના નામે સરકારે આપેલા રૂપિયા 1 કરોડના વ્યવહારોમાં પણ ભારે ગોટાળા મળ્યા છે. મજૂરોના ગાઠિયા, બુંદી અને પાણીની બોટલના 1 કરોડ રૂપિયા પણ આરોપી ચાંઉ કરી ગયો છે. 1 કરોડમાં 30થી 40 લાખના વ્યવહાર તો એવા છે જેમાં ખર્ચા પેટે કરિયાણાના વેપારી કેતન ગોટી અને પેટ્રોલિયમના વેપારીને ચેક આપ્યા હતા. અને બાદમાં તેમની પાસેથી રોકડ લઇ લેવામાં આવી હતી.