સુરત: ઓવરટેક કરવા જતી લક્ઝરી બસે સામેથી આવતી બે ગાડીઓને કચડી નાખી. મા-દીકરાનું કરુણ મોત

ગત 1 ફેબ્રુઆરીના રોજ મહુવા તાલુકાના તરકાણી ગામની સીમમાં લક્ઝરી બસના ચાલકે અન્ય બસને ઓવરટેક કરવાના વિચારમાં રોંગ સાઈડે બસ હંકારી લાવી બે બાઈકને અડફેટમાં લઈ ગંભીર અકસ્માત સર્જી બસ રોડની સાઈડે ઉતારી ઝાડ સાથે અથડાવી દીધી હતી. આ અકસ્માતમાં બે યુવાનોનું ઘટના સ્થળે જ સનસનાટી ભર્યું મોત નીપજ્યું હતું. જ્યારે આ બે બાઈક પર સવાર અન્ય ચાર વય્ક્તિઓ ગંભીર ઈજાગ્રસ્ત થયા છે. જ્યાં બે મૃતકો પૈકી સત્યન પટેલની માતા પ્રતિમાબેન પટેલનું સારવાર દરમિયાન આજે મોત નિપજ્યું છે.

સમગ્ર ઘટના શું બની હતી?

મળતી માહિતી પ્રમાણે, મહુવા અનાવલ સ્ટેટ હાઈવે પર 1 ફેબ્રુઆરી 2020ને શનિવારે તરકાણી ગામની સીમમાં પટેલ ફળિયા નજીક લક્ઝરી બસ (GJ-01-DV-3786) ના ચાલકે સામે ચાલતી બસને ઓવરટેક કરવાની લ્હાયમાં રોંગ સાઈડે બસ હંકારી હતી. દરમિયાન સામેથી આવતી બે મોટરસાયકલને અડફેટમાં લઈ લીધી હતી. આ અકસ્માતમાં મહુવા તાલુકાના તરકાણી ગામે રહી વેહવલ ગામે કળિયા કામ માટે જઈ રહેલ બાઈક (GJ-19-BB-5374)ના ચાલક સત્યન હસમુખભાઈ પટેલ (ઉ.વ.27)નું ઘટના સ્થળે જ મોત નિપજ્યું હતું. જ્યારે તેમની સાથે બાઈક પર સવાર તેમના પિતા હસમુખ નગીનભાઈ પટેલ અને માતા પ્રતિમા પટેલને ગંભીર ઇજા પહોંચતા સારવાર માટે પ્રથમ અનાવલ સરકારી હોસ્પિટલ અને ત્યાંથી વધુ સારવાર માટે નવસારી ખસેડવામાં આવ્યા હતા. જ્યારે પ્રતિમાં પટેલનું સારવાર દરમિયાન મોત નિપજ્યું હતું.