November 16, 2024
સમગ્ર વિશ્વમાં કોરોના(Corona) અને ઓમીક્રોન(Omicron)ની સાથે સાથે મંકીપોક્સે(Monkeypox) પણ હાહાકાર મચાવ્યો છે. મંકીપોક્સના કેસમાં પણ સતત વધારો નોંધાઈ રહ્યો છે. WHO દ્વારા પણ મંકીપોક્સ વાયરસને વૈશ્વિક આરોગ્ય કટોકટી તરીકે જાહેર કરી દીધો છે. ત્યારે મંકીપોક્સને કારણે પ્રથમ મોત(Monkeypox first death) થતા હાહાકાર મચી જવા પામ્યો છે.
અમે તમને જણાવી દઈએ કે, સ્પેનમાં શુક્રવારના રોજ એટલે કે ગઈકાલે પ્રથમ વખત એક વ્યક્તિનું મંકીપોક્સ વાયરસથી મૃત્યુ થયું હોવાનું નોંધાયું છે. યુરોપમાં મંકીપોક્સના વર્તમાન પ્રકોપથી સંબંધિત આ પ્રથમ મૃત્યુ હોવાનું માનવામાં આવે છે. સ્પેનિશ સ્વાસ્થ્ય મંત્રાલયના ઇમરજન્સી અને વિજિલન્સ કોઓર્ડિનેશન સેન્ટર અનુસાર, સ્પેન વિશ્વના એવા કેટલાક દેશોમાંનો એક છે જે મંકીપોક્સથી સૌથી વધુ અસરગ્રસ્ત છે. સ્પેનમાં અત્યાર સુધીમાં લગભગ 4,298 લોકો આ વાયરસથી સંક્રમિત થયા છે.
એક સમાચાર અનુસાર, કેન્દ્રના એક અહેવાલમાં કહેવામાં આવ્યું છે કે, ઉપલબ્ધ માહિતી અનુસાર, મંકીપોક્સના 3,750 દર્દીઓમાંથી 120 દર્દીઓ હોસ્પિટલમાં દાખલ હતા અને આ મંકીપોક્સ વાયરસના ચેપને કારણે એક દર્દીનું મૃત્યુ થયું હતું. એક અધિકારીએ કહ્યું કે મૃત્યુના ચોક્કસ કારણ વિશે કોઈ માહિતી આપી શકાઈ નથી કારણ કે પોસ્ટમોર્ટમના પરિણામો બહાર આવ્યા નથી.
Trending News
નોંધપાત્ર રીતે, વિશ્વ આરોગ્ય સંસ્થા (WHO) એ શનિવારે મંકીપોક્સના પ્રકોપને વૈશ્વિક આરોગ્ય કટોકટી તરીકે જાહેર કર્યું. WHO અનુસાર, મે મહિનાની શરૂઆતથી વિશ્વભરમાં મંકીપોક્સના 18,000 થી વધુ કેસ મળી આવ્યા છે. WHOના વડા ટેડ્રોસ અધાનમ ઘેબ્રેયસસે બુધવારે કહ્યું કે 78 દેશોમાં તેની શોધ થઈ છે. જેમાં યુરોપમાં 70 ટકા અને અમેરિકામાં 25 ટકા કેસ જોવા મળ્યા છે.
ભારતમાં મંકીપોક્સના અત્યાર સુધીમાં 4 કેસ નોંધાયા છે. આમાંથી એક મામલો 24 જુલાઈએ દિલ્હીમાં પણ સામે આવ્યો હતો. મંકીપોક્સના પ્રકોપને ધ્યાનમાં રાખીને કેન્દ્ર સરકારે માર્ગદર્શિકા બહાર પાડી છે. જેમાં મંકીપોક્સથી સંક્રમિત દર્દીઓને 21 દિવસ સુધી આઈસોલેશનમાં રહેવાની સૂચના આપવામાં આવી છે.
મંકીપોક્સ વાયરસના લક્ષણો:
જ્યારે તમે મંકીપોક્સ વાયરસથી સંક્રમિત થાઓ છો, ત્યારે તેના પ્રથમ લક્ષણો 5 થી 21 દિવસમાં દેખાવા લાગે છે. આ દરમિયાન તમને તાવ, માથાનો દુખાવો, સ્નાયુઓમાં દુખાવો, ધ્રુજારી, થાક, કમરનો દુખાવો જેવા લક્ષણો દેખાય છે. આ બધા લક્ષણો દેખાય પછી તેની અસર ત્વચા પર દેખાવા લાગે છે. શરીર પર પિમ્પલ્સ દેખાય છે. હાથ, પગ, હથેળી, પગના તળિયા અને ચહેરા પર નાના પિમ્પલ્સ દેખાવા લાગે છે.
શું મંકીપોક્સથી જીવ જઈ શકે છે?
વર્લ્ડ હેલ્થ ઓર્ગેનાઈઝેશન અનુસાર, મધ્ય આફ્રિકામાં જ્યાં લોકોને પ્રાથમિક આરોગ્ય સુવિધાઓ પણ નથી, ત્યાં આ વાયરસથી સંક્રમિત 10 લોકોમાંથી માત્ર એક જ વ્યક્તિનું મૃત્યુ થઈ શકે છે. જો કે, મંકીપોક્સના ઘણા કિસ્સાઓમાં, દર્દી થોડા અઠવાડિયામાં સ્વસ્થ થઈ જાય છે.
શું આનો કોઈ ઈલાજ છે?
હજુ સુધી મંકીપોક્સ વાયરસની કોઈ ચોક્કસ સારવાર બહાર આવી નથી. આવી સ્થિતિમાં, આ વાયરસથી સંક્રમિત લોકોએ પોતાને અન્ય લોકોથી દૂર રાખવું જરૂરી છે જેથી આ વાયરસ ફેલાય નહીં.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.