ફરી એકવાર રોરો ફેરી શરુ: સુરતવાસીઓને એક જ ચોકલેટ બીજા કાગળમાં થોડા રૂપિયા વધુ મોંઘી કરીને મળી

સુરતના હજીરા પોર્ટથી ઘોઘા સુધી જતી રો પૅક્સ સર્વિસને વડાપ્રધાન નરેન્દ્ર મોદીએ લીલીઝંડી આપીને રવાના કરી હતી. આ રો રો પેક્એસ સર્વિસ શરુ થતાં હજીરાથી ઘોઘા સુધીનું 375 કિલોમીટર અંતર માત્ર 90 કિલોમીટર થઈ જશે અને  ચાર કલાકમાં આંતર કપાઈ શકશે. પણ આ રોરો ફેરી દહેજ ઘોઘા ફેરી બંધ કરીને હજીરા ઘોઘા કરાઈ છે. આમ સુરતવાસીઓને એક જ ચોકલેટ બીજા કાગળમાં થોડા રૂપિયા વધુ મોંઘી કરીને મળી છે. જોકે જલ્દી સૌરાષ્ટ્ર પહોચી જવા માંગતા સુરતવાસીઓમાં આ રો રો ફેરી ઘણી લોકપ્રિય છે તે બુકિંગ ના આંકડા જ જણાવે છે. રો-પેક્સ ફેરીનું હાલ ઓનલાઈન બુકિંગ ચાલી રહ્યું છે. શરૂઆતના 24 કલાકમાં જ 3800 યાત્રી અને 1700 વાહનનું બુકિંગ થયું હોવાનું જાણવા મળ્યું છે.

આ રોરો ફેરી પ્રધાનમંત્રી મોદીના ડ્રીમ પ્રોજેક્ટ અને દિવાળી ભેટ રૂપે પ્રધાનમંત્રી મોદીના હસ્તે વર્ચ્યુઅલ ઉદઘાટન કરવામાં આવ્યું છે. આ પ્રસંગે સુરતના હજીરા ખાતે મુખ્યમંત્રી રૂપાણી અને કેન્દ્રીય મંત્રી મનસુખ માંડવીયા હાજર રહ્યા છે. પ્રધાનમંત્રી મોદીએ સંબોધન કરતા જણાવ્યું હતું કે, ગુજરાત ભારતમાં સમુદ્રી દ્વાર તરીકે પ્રખ્યાત થઈ રહ્યું છે. સુરતથી સૌરાષ્ટ્ર જવા માટે 10થી 12 કલાકની માર્ગ મુસાફરી કરવી પડે છે. રો-પેક્સ સેવાને કારણે આ મુસાફરી માત્ર 4 કલાકની થઇ જશે.

વડાપ્રધાન નરેન્દ્ર મોદીએ જણાવ્યું હતું કે, આ દરિયાઈ રસ્તાને કારણે જમીન માર્ગનો ટ્રાફિક ઓછો થશે અને સાથે સાથે પ્રદૂષણ ઘટશે. તેઓએ જણાવ્યું હતું કે ભારતનો સમુદ્ર માર્ગો દ્વારા થતો વ્યવસાયની હજારો વર્ષ પુરાણો છે. આઝાદીના 70 વર્ષ સુધી સમુદ્રી વારસાને જાળવવા માટે કોઈ ખાસ કામગીરી કરવામાં આવી નથી.

ઉલ્લેખનીય છે કે, આ રો રો ફેરી હજીરા થી ઘોઘાની ટ્રાયલ વેળા જ ખોટકાઇ હતી. યાંત્રિક ખામી સર્જાતા સુરતના હજીરા ખાતે બપોરે ૧૨ વાગ્યે આવનાર જહાજ છેક સાંજે ૬ વાગ્યે પહોંચ્યું હતું. મધદરિયે જ ટ્રાન્સમીશન પેનલ બગડવા સાથે રીંગમાં પણ લીકેજ થતાં નિયત ઝડપ કરતાં ઘણી ઓછી ઝડપે જહાજ ટગ બોટની મદદથી સુરત પહોંચી શક્યું હતું.