ગુજરાતમાં ફરીએકવાર હોસ્પિટલની ભૂલનું પરિણામ પરિવારને ભોગવવું પડ્યું: દીકરો લાઈનમાં ઉભો હતો અને પિતા…

સરકારી હોસ્પિટલોમાં અંદર શું થાય છે એ તો ભગવાન જાણે, પણ અંદર ભારે અફરાતરફી મચેલી હોય છે. વહીવટી સ્ટાફમાં અંદરોઅંદર કોઈ પ્રકારનું સંચાલન હોતુ નથી. બહાર દર્દીના સ્વજનો ચિંતા કરતા રહે છે, પણ અંદર દર્દીના શું હાલચાલ છે તે ખબર પડતી નથી. આ દરમિયાન વારંવાર સ્વજનોના પૂછવા છતા પણ દર્દી અંદર કેવી હાલતમાં છે તે ખબર પડતી નથી.

આવો જ એક કિસ્સો રાજકોટમાંથી સામે આવ્યો છે. એક પુત્ર સમરસ હોસ્ટેલમાં દાખલ પોતાના પિતા સાથે વાત કરવા લાઈનમાં ઉભો હતો. પિતા મળશે તો જ્યુશ આપીશ તેવા હેતુ સાથે તે જ્યુશની બોટલ લઈને આવ્યો હતો. પરંતુ તેને  ક્યાં ખબર જ હતી કે, તેના પિતાનું કલાકો પહેલા અવસાન થઈ ગયું છે. ગુજરાતમાં ખૂણેખાંચરે હાલ આવા અનેક કિસ્સા બની રહ્યાં છે. સ્વજનોને ખબર જ નથી હોતી કે, તેમના દર્દીઓ ક્યાં અને કેવી હાલતમાં સારવાર લઈ રહ્યાં છે. અનેક કિસ્સાઓમાં દર્દીઓ મૃત્યુ પણ પામે છે.

મળતી માહિતી મુજબ, રાજકોટના ગોકુલ પાર્કમાં રહેતા હિમાંશુ અગ્રાવતના પિતા બાબુલાલ અગ્રાવતને સિવિલ હોસ્પિટલમાં દાખલ કરવામાં આવ્યા હતા. પિતાને હોસ્પિટલમાં દાખલ કર્યા બાદ પુત્ર ઘરે પરત આવી ગયો હતો. બીજા દિવસે હિમાંશુ અગ્રાવત અને તેમના પત્ની પિતાને મળવા સિવિલ હોસ્પિટલ ગયા હતા. તેમની ખબર પૂછવા અને તેમને જ્યુસ આપવા તેઓ હોસ્પિટલના પાછળના ગ્રાઉન્ડમાં વીડિયો કોન્ફરન્સ માટે કરાયેલા કંટ્રોલ રૂમ પાસે લાઈનમાં ઉભા રહ્યા હતા.

આ દરમિયાન ત્રણ કલાક લાઈનમાં ઉભા રહ્યા બાદ તેમનો વારો આવ્યો હતો અને તેમણે પોતાનું નામ રજિસ્ટર્ડ કરાવ્યું હતું. દોઢ કલાક વિત્યા બાદ પણ તેમનો પરિવારના મોભી સાથે કોઈ સંપર્ક થઈ શક્યો ન હતો. આ દરમિયાન થોડી જ વારમાં કાઉન્ટર ઉપરથી પણ કહી દેવાયું હતું કે, બાબુલાલ અગ્રાવત નામનું દર્દી સિવિલ હોસ્પિટલમાં મળી રહ્યું નથી એટલા માટે થોડી વાર રાહ જોવી પડશે.