રાજકોટમાં એકસાથે બે-બે આપઘાત: માતા વિહોણા યુવાને ગળાફાંસો ખાઈ લીધો અને બીજાએ...

રાજકોટ(ગુજરાત): રાજકોટ શહેરમાં આપઘાતના વધુ 2 બનાવ સામે આવ્યા છે. એક બનાવમાં માતા વિહોણા યુવાને ગળાફાંસો ખાઇ લીધો જ્યારે બીજા બનાવમાં પ્રૌઢે ઝેરી દવા પી આપઘાત કરી લીધો છે. પહેલા બનાવમાં રાજકોટના શીતળાધારમાં રહેતા હાર્દિક દેવજીભાઇ સોલંકી નામના યુવાને ગળાફાંસો ખાઇ લીધો હતો. ઘટનાની જાણ પિતા દેવજીભાઇને થતા તરત નીચે ઉતારી 108ને જાણ કરી હતી. ત્યારે 108ની ટીમે યુવાને મૃત જાહેર કર્યો હતો. આજી ડેમ પોલીસને સમગ્ર ઘટનાની જાણ કરી હતી.

મૃતકના પિતા દેવજીભાઇએ પોલીસને જણાવ્યું હતું કે, હાર્દિક તેમનો એકનો એક પુત્ર હતો. પિતા-પુત્ર પત્નીના અવસાન પછી એકલા રહેતા હતા. ત્યારે ગત રાતે હાર્દિક જમવા બનાવવા જાઉં છું તેમ કહી ઘરમાં ગયો હતો. ઘણો સમય થયો હોવા છતાં હાર્દિકનો અવાજ નહિ આવતા પિતા ઘરમાં ગયા હતા. ત્યારે હાર્દિક ફંદા સાથે લટકતો જોવા મળ્યો હતો. પુત્રના આપઘાત પાછળના કારણથી પિતા પણ અજાણ છે.

બીજા બનાવમાં ખારચિયા ગામે ઉકાભાઇ માવજીભાઇ મકવાણા નામના એક વૃદ્ધ ઝેરી દવા પી લેતા સારવાર માટે તેમને હોસ્પિટલ ખસેડાયા હતા. જ્યાં સારવાર દરમિયાન તેમનું મોત થયું હતું. પોલીસ તપાસમાં ઉકાભાઇએ બીમારીથી કંટાળીને આ પગલું ભર્યું હોવાનું જાણવા મળ્યું છે. તેમને સંતાનમાં 1 પુત્રી છે. 1 વર્ષ પહેલા જ પત્નીનું અવસાન થયું છે.