February 17, 2025
વાંકી એ મુન્દ્રા તાલુકાનું નાનકડું ગામ છે!! પ્રવાસન સ્થળોમાં વાંકી તીર્થને આગવું સ્થાન મળ્યું છે. આ મંદિરના દર્શન કરવા દેશ-વિદેશથી લોકો આવે છે. વાંકી તીર્થના સાનિધ્યમાં ૧૯૩૯માં શ્રી કાનજી રતનશી પ્રાથમિક શાળા શરૂ કરવામાં આવી છે અને કોરોનાના સમયગાળા દરમિયાન ગુરુમંદિરમાં એક વૃક્ષ નીચે શિક્ષણનું કાર્ય કરવામાં આવ્યું હતું, તેમ શાળાના ભૂતપૂર્વ વિદ્યાર્થી અને મુંબઈ નિવાસી શ્રી બાબુભાઈ ભવાનજી છેડાએ જણાવ્યું હતું.
આ શાળાના બાળકો માત્ર ચાર દીવાલોની અંદર જ નહીં પરંતુ રવીન્દ્રનાથ ટાગોર અને રૂસો જેવા ચિંતકો દ્વારા વિચારેલા કુદરતની ગોદમાં અનુભવ દ્વારા પણ શિક્ષણ મેળવે છે. આ શાળામાં તમામ સુવિધાઓ ઉપલબ્ધ છે. શાળાની શરૂઆત પ્રાર્થનાથી થાય છે. અત્યાધુનિક પ્રાર્થના કાર્યક્રમથી સજ્જ, પ્રાર્થના હોલ તમામ વિદ્યાર્થીઓને સમાવી શકે છે. વિદ્યાર્થીઓમાં વિશેષ શક્તિ લાવવાના પ્રયાસો કરવામાં આવે છે. દરેક વર્ગખંડમાં સ્માર્ટ બોર્ડ, ગ્રીન બોર્ડ અને સોફ્ટ બોર્ડ તેમજ એર સાધનસંપન્ન હવા-ઉજાસ સાથે સજ્જ વિજ્ઞાન પ્રયોગશાળા છે.
Trending News
આ ઉપરાંત, ખેલ મહાકુંભ અંતર્ગત બાળકોના સર્વાંગી વિકાસ માટે આ શાળાના બાળકોએ તાલુકાથી લઈને જિલ્લા કક્ષા સુધીની વિશેષ રમતોમાં પોતાની શક્તિનું પ્રદર્શન કર્યું છે. વિદ્યાર્થીઓને દર શનિવારે યોગ, પ્રાણાયામ અને વ્યાયામ કરીને આરોગ્યની સુવિધા પૂરી પાડવામાં આવે છે.
પુસ્તક એ આપણો સાચો અને સારો મિત્ર છે. તેને સાર્થક બનાવવા તેમજ જીવનમાં પુસ્તકોનું મહત્વ સમજાવવા માટે શાળામાં વિવિધ વિષયોના ૩૮૪૩ જેટલાં પુસ્તકો વસાવવામાં આવ્યા છે. પુસ્તકાલયનું સમગ્ર સંચાલન વિદ્યાર્થી કોમ્પ્યુટર દ્વારા જ કરે છે. એરકન્ડિશન્ડ એસી કોમ્પ્યુટર લેબનું નિર્માણ વર્ષ 2019માં કરવામાં આવ્યું હતું. જેમાં વિદ્યાર્થીઓને કોમ્પ્યુટરનું શિક્ષણ આપવામાં આવે છે.
ખાનગી શાળાની સુવિધાઓ સાથે પણ સ્પર્ધા કરતી આ સરકારી શાળાને ગુજરાત સરકાર તરફથી સ્વચ્છતા માટે રાજ્ય કક્ષાનો એવોર્ડ મળ્યો છે. બાળકોને પીવા માટે શુદ્ધ પાણી મળી રહે તે માટે શાળામાં બે પાણીની પરબ છે. સ્વચ્છ અને વ્યવસ્થિત શૌચાલયની સુવિધા પણ છે. આ ઉપરાંત, શાળામાં છોકરીઓ અને છોકરાઓ માટે અલગ-અલગ શૌચાલય પણ ઉપલબ્ધ છે. વિદ્યાર્થીઓને શુદ્ધ અને સાત્વિક ભોજન મળી રહે તે માટે મધ્યાહન ભોજનની પણ વ્યવસ્થા કરવામાં આવી રહી છે. અભ્યાસની સાથે વિદ્યાર્થીઓએ વકતૃત્વ સ્પર્ધા, નિબંધ લેખન સ્પર્ધા, કાવ્ય લેખન સ્પર્ધામાં જિલ્લા કક્ષા સુધી પોતાની પ્રતિભા દર્શાવીને નંબર પ્રાપ્ત કર્યા છે. આ રીતે શાળામાં સહઅભ્યાસિક પ્રવૃત્તિઓ પણ કરવામાં આવે છે.
આ ઉપરાંત, શાળાની શૈક્ષણિક પ્રવૃત્તિમાં નબળા વિદ્યાર્થીઓ માટે વધારાના વર્ગો, વાલીઓનું કાઉન્સેલિંગ અને નિષ્ણાતો સાથે મુલાકાત તેમજ સાપ્તાહિક પરીક્ષાઓ દ્વારા સતત મૂલ્યાંકનનો સમાવેશ થાય છે. સાથોસાથ દ્રશ્ય-શ્રાવ્ય શિક્ષણની સાથે સ્માર્ટ ક્લાસ દ્વારા પ્રેક્ટિકલ મોડલ દ્વારા સમજણ આપવામાં આવી છે. બાળકોમાં વય, વર્ગ અને અભ્યાસ પ્રમાણે એકતાની ભાવના પેદા કરવા કુદરતી વાતાવરણ અને પ્રકૃતિના સાનિધ્ય વચ્ચે ઊર્જા અને સભાનતા કેળવવાના ઉદ્દેશ્ય સાથે વર્ષમાં એક વખત પ્રવાસનું આયોજન કરવામાં આવે છે. આ રીતે ધાર્મિક, ઐતિહાસિક અને પ્રાકૃતિક સ્થળોની મુલાકાત લે છે.
વિદ્યાર્થીઓ રાજ્ય સરકાર દ્વારા લેવામાં આવતી NMMS, નવોદય પરીક્ષા, તીવ્રતા શોધ, ચિત્ર તેમજ સામાન્ય જ્ઞાનની પરીક્ષામાં પણ પાસ થાય છે. રાજ્યના મેરિટ લિસ્ટમાં પણ સામેલ છે. તેમના માટે વિશેષ વર્ગોનું પણ આયોજન કરવામાં આવે છે. રાષ્ટ્રીય, ધાર્મિક અને સામાજીક તહેવારો હર્ષોલ્લાસ સાથે ઉજવવામાં આવે છે તેમજ સામાજિક જાગૃતિ લાવવા માટે વિશેષ દિવસની ઉજવણી કરવામાં આવે છે.
શાળાને ઘણી પ્રશંસા મળી છે. જેમાં વર્ષ 2008-09માં શાળા ગુણવત્તા પુરસ્કાર આપવામાં આવ્યો હતો. વર્ષ 2017-18માં રાજ્ય કક્ષાનો સ્વચ્છતા પુરસ્કાર. વર્ષ 2019-20ના રાજ્ય કક્ષાના ઈનોવેશન ફેરમાં પ્રાર્થના સોફ્ટવેર અને લાઈબ્રેરી સોફ્ટવેરનો નવતર ઉપયોગ, જેમાં આ શાળાની કામગીરીને સ્થાન મળ્યું. શાળાના આચાર્ય નારણભાઈ સવાભાઈ ગોયલ જણાવે છે કે, ખાસ વાત એ છે કે દર વર્ષે કચ્છ જિલ્લાના વિજ્ઞાન મેળામાં આ શાળાના વિજ્ઞાન પ્રયોગોની પસંદગી કરવામાં આવે છે.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.