ચોરી કરેલા દાગીના વેચવા, સુરતની બજારમાં નીકળ્યો ચોર – એક ભૂલના કારણે થવું પડ્યું જેલભેગું…

રાજ્યમાં અવાર-નવાર ચોરીની ઘટનાઓ સામે આવતી રહે છે ત્યારે આજે ફરી એક વખત આવી જ એક ઘટના સુરતમાંથી સામે આવી છે. સૂરતના ડીંડોલી વિસ્તારમાં બંધ ફ્લેટમાં એક વ્યક્તિએ ચોરીની ઘટનાને અંજામ આપ્યો હતો. ડિંડોલી વિસ્તારમાં બંધ ફ્લેટને નિશાન બનાવીને ચોરી કરનાર આરોપીને પોલીસે ઝડપી લીધો છે.

દક્ષીણ ગુજરાતમાં આવેલ સૂરતના ડીંડોલીમાં 4.66 મુદ્દામાલ સાથે ઝડપાયેલા આરોપીએ પોલીસ પૂછપરછમાં જણાવ્યું હતું કે, લોકડાઉન બાદ તે બેકાર થઈ ગયો હોવાથી બાઈક પર રેકી કરવા નીકળતો હતો. આ દરમિયાન જે મકાન બંધ હોય તેમાં ચોરીની યુક્તિ ચલાવતો હતો. ઘરેણા વેચવા જતા પોલીસે તેને ઝડપી લીધો હતો.હાલ પોલીસે આરોપીની ધરપકડ કરી વધુ તપાસ હાથ ધરી છે.

ચોરી કર્યા બાદ આ યુવક આજ રોજ ઘરેણા વહેચવા જઈ રહ્યો હોવાની માહિતી પોલીસને મળી હતી. પોલીસે બાતમીના આધારે, જયેશ ઉર્ફે જીતુ સોમાભાઈ પટેલ (ઉ.વ.આ.38) રહે. સચિન ગુ.હા.બોર્ડ રોડ મૂળગામ ભટલાવ તા.બારડોલીને સોના ચાંદીના દાગીના, મોબાઈલ ફોન તથા સ્પલેન્ડ બાઈક એમ કુલ મળી 4.66 લાખના મુદ્દામાલ સાથે ઝડપી પાડ્યો છે.