ગરીબી અને મજબૂરીનો ‘લાભ’ ઉઠાવતી સુરત પાલિકાની દંડ ટીમનો માનવતાને શર્મસાર કરતો વિડીયો થયો વાયરલ

પહેલાના જમાનામાં મોટાભાગે બોલવામાં આવતી કહેવત ‘અંધેરી નગરીને ગંડુ રાજા, ટકે શેર ભાજી ટકે શેર ખાજા’ આજે હવે સુરત શહેરમાં સાર્થકતા થઈ હોય તેવું એક કિસ્સામાં જોવા મળી રહ્યું છે. હાલમાં સોશ્યલ મીડિયામાં એક વિડીયો ખુબ જ ઝડપથી વાઈરલ થઈ રહ્યો છે. આ વીડિયો વરાછા કે કતારગામનો હોવાનું જાણવા મળી રહ્યું છે.

વિડીયોમાં જોય શકાય છે કે, એક બાળકની ગરીબી અને મજબૂરીનો ‘લાભ’ ઉઠાવતી પાલિકાની દંડ ટીમે માનવતાને મારી નાંખી છે. રસ્તા પર લારી (Lari viral video) ચલાવીને પેટિયું રળવું તે કાયદાની કઈ કલમ હેઠળ ગુનો છે તે સાબિત કરવામાં સેકન્ડો પણ વેઠતા પાલિકાના અધિકારીઓએ રોજના 400 રૂપિયા ન કમાઈ શકતા એક ગરીબ બાળકને 400 (400 Rs Fine)રૂપિયાનો મસમોટો દંડ ફટકારી દીધો.

હાલમાં સોશ્યલ મીડિયા ઉપર આ ઘટનાનો એક વિડીયો ખુબ જ ઝડપથી વાઈરલ થઈ રહ્યો છે. જોકે, વીડિયો જ્યાંનો પણ હોય પરંતુ આ વિડીયો અંગ્રેજ હકૂમતની યાદ અપાવે છે. પાલિકાના દંડના કારણે લાલચોળ થયેલો બાળક જ્યારે પોતાની આંખમાંથી પાણીની જેમ આંસુડા સારે છે ત્યારે લોકોની માનવતા જાગી ઉઠે છે. આ વીડિયો જોઈને સાશકો પણ કદાચ દ્રવી ઉઠશે.

સમગ્ર ઘટના વિશે મળતી માહિતી અનુસાર, SMCના અધિકારીઓ દ્વારા લારી ચલાવી પરિવારનું ગુજરાન ચલાવવા પેટિયું રળતા 15 વર્ષના બાળકને 400 રૂપિયાના દંડની સ્લિપ પકડાવી દેવામાં આવે છે. જેનો લોકો દ્વારા વિરોધ કરવામાં આવ્યો છે. રડતા બાળકને લોકોએ સધિયારો આપીને દંડ કરનારનો વીડિયો શૂટ કરતાં અધિકારીઓ નાસી જાય છે. સાથે જ વીડિયો ઉતારનાર લોકોને જાગૃત થવા અપીલ કરતો જોવા મળે છે.