કોરોનાવાયરસને લીધે ડાયમંડ ઉદ્યોગને આ રીતે પડશે મોટો ફટકો

ચીનમાં ફેલાયેલા કોરોના વાયરસની મોટી અસર સુરત-મુંબઈના હીરા બજાર સહિત દેશના અન્ય  જેમ્સ સ્ટોનના વેપારને પણ થઇ છે. માર્ચમાં હોંગકોંગમાં થનારો જેમ એન્ડ જ્વેલરી શો મે મહિનામાં આયોજિત થશે. કાયમ 10 દિવસ માટે થતો ફેર ટૂંકાવીને 4 દિવસનો કરાયો છે. જેથી સુરત-મુંબઈના 500 એક્ઝિબિટર્સ, 10,000 મુલાકાતી સહિત સ્થાનિકોને આ બે માસ દરમિયાન મળનારો રૂ.9000 કરોડથી વધુનો વેપાર જોમખમાં મુકાયો છે. તજજ્ઞો જણાવે છે કે, એક્ઝિબિશન પાછું ઠેલાતા થતાં વેપારમાં 25 ટકાની અસર નોંધાશે.

ડાયમંડના જથ્થાની નિકાસ અટકી પડી છે

હોંગકોંગની તમામ શાળાઓ કોલેજો સહિતના તમામ જાહેર સેક્ટરમાં તા.3 માર્ચ સુધી વેકેશન જાહેર કરવામાં આવ્યું છે. સોમવારે હોંગકોંગથી મળેલા સમાચાર પ્રમાણે માર્ચમાં થનારો જેમ એન્ડ જ્વેલરી શો કોરોનાવાયરસના કારણે પાછો ઠેલાયો છે. આ શો 18થી 21 મે 2020 દરમિયાન આયોજિત થવાની સંભાવના છે. કોરોના ભયના પગલે હોંગકોંગમાં રહેતા ભારતીય હીરા ઉદ્યોગકારો ભારત પરત ફરવા માંડ્યા છે. હોંગકોંગ જ્વેલરી શો માટે સુરતમાં તૈયાર થયેલા પોલિશ્ડ ડાયમંડના જથ્થાની નિકાસ અટકી પડી છે. હોંગકોંગ શો પાછળ ઠેલાતા ઘણી સમસ્યા ઉભા થવાની સંભાવના છે.