સુરત: સોસાયટીમાં કાર ચલાવનારની બેદરકારીથી દોઢ વર્ષના બાળકે જીવ ગુમાવ્યો

સુરતમાં માતાપિતાની આંખ ઉઘાડતો કિસ્સો સામે આવ્યો છે. માત્ર દોઠ વર્ષનો બાળક ઘર નજીક રમતો હતો ત્યારે કાર ચાલકે તેને કચડી નાખ્યો હતો. ચાલક કારને રિવર્સમાં લઈ રહ્યો હતો ત્યારે બાળક કાર નીચે આવી ગયો હતો.
બાળકને સારવાર માટે લઇ ગયા બાદ તબીબોએ તેને મૃત જાહેર કર્યો હતો. પોલીસે આ મામલે કાર ચાલક વિરુદ્ધ ગુનો નોંધીને તેની ધરપકડ કરી હતી. કાર ચાલક સોસાયટીમાં સાબુ વેચવા આવ્યો હોવાનું સામે આવ્યુ છે. આ ઘટના બાદ સ્થાનિકોમાં રોષ જોવા મળ્યો છે.

સુરતના પુના વિસ્તારમાં આવેલી શંકરનગર સોસાયટીમાં બનેલી ઘટના ભલભલાને વિચારવા મજબૂર કરી દે તેવી છે. આ સોસાયટીમાં રહેતા કનક કાનાણી રત્નકલાકાર તરીકે ગુજરાન ચલાવે છે. ગતરોજ સોસાયટીમાં તેમનો દોઢ વર્ષનો બાળક રમતો હતો તે સમયે એક મારુતિ વેન લઈને એક વ્યક્તિ સોસાયટીમાં સાબૂ વેચવા માટે આવ્યો હતો. કામ પૂરું થયા બાદ તે પોતાની ગાડી રિવર્સ લઈને જઈ રહ્યા હતા ત્યારે કનકભાઈનો દોઢ વર્ષનો પુત્ર આર્યન અચાનક ગાડી નીચે આવી ગયો હતો.

નોંધનીય છે કે, રાજ્યમાં છેલ્લા કેટલાક સમયગાળાથી અકસ્માતની ઘટનાઓમાં ઉત્તરોત્તર વધારો થઇ રહ્યો છે. થોડા સમય પહેલા પણ રસ્તા પર રમી રહેલા બાળક પર ડોક્ટર કાર ચાલકની કાર ફરી વળતા બાળકનું કમકમાટી ભરેલું મોત નિપજ્યું હતું.