ભણતરનું મહત્વ: સામાન્ય મિલ કામદારનો એક પુત્ર સ્પેનમાં વૈજ્ઞાનિક, બીજો સ્કૂલમાં પ્રિન્સિપાલ અને દીકરી શિક્ષિકા

આજે નિવૃત્ત જીવન જીવતા જશભાઇ મણીભાઇ મકવાણા નડિયાદના સલુણ ગામે રહે છે. તેમણે ખૂબ મહેનત કરીને ત્રણ સંતાનોને ઉજ્જવળ કારકિર્દી આપી છે. તેમનો વચલો દીકરો રજનીકાંત મકવાણા વિશ્વની ત્રીજા નંબરની સ્પેનમાં આવેલ સાલામનકા યુનિવર્સિટીમાં ન્યુક્લિયર રિએક્શનના અભ્યાસ માટે ફેલોશીપ હેઠળ કામગીરી કરી રહ્યો છે. સમગ્ર દેશમાંથી આ સિદ્ધિ હાંસલ કરનાર રજની એકમાત્ર વૈજ્ઞાનિક છે.

આજે વિશ્વ પિતા દિને પિતા જશભાઇએ જણાવ્યું કે, પરિવારની જવાબદારીઓને કારણે તેઓ 18 વર્ષની ઉંમરથી જ મીલમાં કામ કરતા હતા. પરંતુ સંતાનોને સારો અભ્યાસ મળે તે માટે તેઓએ રૂપિયા 1,200 ના પગારમાં થી રૂપિયા 500 ઘર ખર્ચમાં અને બાકીના રૂપિયા ત્રણ સંતાનોનાં અભ્યાસ પાછળ ખર્ચતા હતા.

તેમના ઘેર ગાય-ભેંસ પણ હતી. પરંતુ સંતાનોનાં અભ્યાસ પાછળ પત્ની ધ્યાન આપી શકે તે માટે તેમને ગાયો-ભેસો પણ વેચી દીધી હતી. ત્યાંથી આવેલા રૂપિયા પણ સંતાનોનાં અભ્યાસ પાછળ ખર્ચ કર્યા હતા. જેના પરિણામ સ્વરૂપ આજે રજની સ્પેનની યુનિવર્સીટીમાં સાયન્ટિસ્ટ છે. સૌથી મોટો દીકરો મુકેશ મકવાણા સરકારી શાળામાં પ્રિન્સિપાલ છે, અને દીકરી પણ સુરતની શાળામાં શિક્ષિકા છે.