Hardik Pandya ના આ એક નિર્ણયે પલટી નાખી આખી ગેમ, આ રીતે જીતી હાથમાંથી ગયેલી મેચ

ભારત(India) અને શ્રીલંકા(Sri Lanka) વચ્ચે વાનખેડે સ્ટેડિયમમાં પ્રથમ T20 મેચ(T20 match) રમાઈ હતી. આ રોમાંચક મેચમાં હાર્દિક પંડ્યા (Hardik Pandya)ની કેપ્ટન્સીમાં ટીમ ઈન્ડિયાએ છેલ્લા બોલ પર શ્રીલંકાને પરાજય આપ્યો હતો અને ભારતે 2 રનથી જીત મેળવી હતી. આ મેચમાં શ્રીલંકાના કેપ્ટને ટોસ જીતીને પ્રથમ બોલિંગ કરવાનો નિર્ણય કર્યો હતો.

દીપક હુડા અને અક્ષર પટેલ વચ્ચે મહત્વની ભાગીદારી:
આ મેચમાં ઈશાન કિશને ભારતને સારી શરૂઆત અપાવી હતી. ભારતે પહેલી જ ઓવરમાં 17 રન બનાવ્યા હતા. પરંતુ ત્રીજી ઓવરથી જ શ્રીલંકાની ટીમે નિયમિત અંતરે ભારતીય ટીમની વિકેટો લેવાનું શરૂ કરી દીધું હતું. ઈશાનની વિકેટ પડ્યા બાદ ભારતનો સ્કોર 77/4 હતો.

એવું લાગતું હતું કે ભારત ભાગ્યે જ 150 સુધી પહોંચશે. આ દરમિયાન કેપ્ટન હાર્દિક પંડ્યાએ સારી પરંતુ ધીમી ઇનિંગ રમીને ટીમનો સ્કોર 94/5 સુધી પહોંચાડ્યો હતો. હાર્દિકે 27 બોલમાં 29 રન બનાવ્યા હતા. પરંતુ તે પછી દીપક હુડા અને અક્ષર પટેલ વચ્ચેની ભાગીદારી હતી, જેણે ભારતનો સ્કોર 162/5 સુધી પહોંચાડ્યો હતો. બંનેએ 35 બોલમાં 68 રનની અણનમ ભાગીદારી કરી હતી.

શિવમ માવીએ ડેબ્યૂ મચાવી ધૂમ, કુલ 4 વિકેટ લીધી:
આ પછી શ્રીલંકા આ મેચ સરળતાથી જીતી શકી હોત. પરંતુ શિવમ માવીને ડેબ્યૂ કરવાનો હાર્દિક પંડ્યાનો નિર્ણય ટીમ માટે કામ આવ્યો. શિવમે શરૂઆતમાં જ શ્રીલંકાને બે ઝટકા આપ્યા હતા. જેના કારણે શ્રીલંકાએ માત્ર 24 રનમાં બે વિકેટ ગુમાવી દીધી હતી. આ પછી ભારતીય બોલરો નિયમિત અંતરે વિકેટ લેતા રહ્યા. પરંતુ તે પછી કેપ્ટન દાસુન શનાકા અને વાનિન્દુ હસરંગા વચ્ચે મહત્ત્વપૂર્ણ ભાગીદારી થઈ હતી. આ બંનેએ 23 બોલમાં 40 રન કાર્યા હતા.