ભાવનગરના ગારીયાધારમાં તળાવમાં નાહવા પડેલાં 4 બાળકોનું તળાવમાં ડૂબી જવાથી કરુણ મોત, પરિવારજનોમાં છવાયો સન્નાટો

ભાવનગર જીલ્લામાંથી એક કરુણ ઘટના સામે આવી છે. ભાવનગરના ગારીયાધારના મોટી વાવડી ગામમાં એક સાથે ચાર બાળકોના તળાવમાં ડૂબી જવાથી મોત નીપજ્યા હતા. ચાર બાળકો ગામના પાદરે તળાવમાં ન્હાવા ગયા હતા જ્યાં ડૂબી જતા ચાર બાળકોના કરુણ મોત થયા છે. આ સમગ્ર ઘટનાને લઈને ગામમાં ભારે ચકચાર મચી ગયો છે.

મળતી માહિતી અનુસાર, ભાવનગર જીલ્લામાં આવેલ ગારીયાધારના મોટી વાવડી ગામમાં રહેતા ચાર બાળકો મોન્ટુ હિંમતભાઈ ભેંડા, જયેશ ભુપતભાઈ કાકડીયા, મિત શંભુભાઈ ખોખાણી, તરુણ શંભુભાઈ ખોખાણી ગામના પાદરે આવેલા તળાવમાં ન્હાવા માટે પડ્યા હતા પરંતુ તેમનું મોત નીપજ્યું હતું. સાંજ થવા છતાં પણ બાળકો ઘરે ન આવતા ઘરના સભ્યોએ બાળકોની શોધખોળ શરુ કરી દીધી હતી.

પરિવારના સભ્ય દ્વારા શોધખોળ કરતા તળાવના કાંઠેથી સાયકલ અને બાળકોના ચપ્પલ મળી આવ્યા હતા. બાળકો તળાવમાં ડૂબી જવાની શંકા જતા ગામવાસીઓ દ્વારા તળાવમાંથી બાળકોના મૃતદેહને બહાર કાઢવામાં આવ્યા હતા. સમગ્ર ઘટનાની જાણ થતા મામલતદાર, ફાયર કર્મચારીઓ અને પોલીસની ટુકડી ઘટના સ્થળે દોડી આવી હતી. મૃત્યુ પામેલા ચાર બાળકોમાં બે બાળકો સગ્ગા ભાઈઓ હતા.