ટ્રક બન્યો યમદૂત: ગોંડલ હાઈવે પાસે ટ્રક અને બાઈક વચ્ચે સર્જાયો ગંભીર અકસ્માત, બાઇકચાલકનું ઘટનાસ્થળે જ મોત

ગુજરાતમાં આવાર-નવાર અકસ્માતની ઘટનાઓ સામે આવતી રહે છે. ત્યારે ગઈકાલના રોજ રાજકોટમાં એકસાથે બે અકસ્માતના બનાવો બન્યા હતા. જેમાં ઘટનાસ્થળે જ બે વ્યક્તિઓના મૃત્યુ થયા હતા. ત્યારે આજે ફરી એક વખત અકસ્માતની ઘટના સામે આવી છે. આટકોટના ગોંડલ હાઇવે પાસે યમદૂત બનીને આવેલા ટ્રકે સામેથી આવતા બાઇક ચાલકને હડફેટે લેતા બાઈક સહિત ચાલકને 300 મીટર સુધી ઢસડ્યો હતો અને બાઈક ચાલકનું ઘટના સ્થળે જ કમકમાટીભર્યું મોત થયું હતું.

ઘટનાસ્થળે લોકોના ટોળા એકત્રિત થઈ ગયા હતા
સમગ્ર ઘટના અંગે મળતી માહિતી અનુસાર, ગોંડલ હાઇવે પાસે આવેલા ખારચીયા નજીક ગોંડલથી ટ્રક આવતો હતો. આટકોટ તરફ જતો ટ્રક ડ્રાઈવર સંપૂર્ણ પણે બેફામ બનીને ટ્રક હંકારતો હતો. એ સમયે સામેથી બાઈક આવતા ટ્રક અને બાઈક વચ્ચે જોરદાર ટક્કર થઈ હતી. જેમાં ટ્રક ચાલકે બાઈકને અડફેટે લેતા બાઇક ચાલકનું ઘટનાસ્થળે જ મોત હતું અને ટ્રક ખાડામાં પલ્ટી મારી ગયો હતો. જ્યારે બાઈકનો પણ ભુક્કા બોલી ગયો હતો. આ અકસ્માત સર્જાતા ઘટનાસ્થળે લોકોના ટોળા એકત્રિત થઈ ગયા હતા.

લાશને પોસ્ટમોટમ માટે મોકલવામાં આવી 
આ અકસ્માત થતાં આટકોટનાં PSI કે.પી.મેતા, સહિતનો પોલીસ કાફલો ઘટના સ્થળે દોડી ગયો હતો. ઘટના સ્થળે લોકોએ તપાસ કરતાં જાણવા મળ્યું હતું કે મૃતક બાઈક ચાલક દડવા ગામનો વતની હતો અને તેનું નામ દેવેન્દ્ર વિરાભાઈ રાઠોડ છે. લાશને પોસ્ટમોટમ માટે જસદણ સિવિલ હોસ્પિટલમાં ખસેડવામાં આવી હતી.