ટ્રક ડ્રાઈવરોની હડતાલના કારણે વધશે મોંઘવારી? ટ્રાન્સપોર્ટ સિસ્ટમ ઠપ, માત્ર 3 જ દિવસમાં થઈ શકે છે કરોડોનું નુકશાન

Truck Drivers Strike: હિટ એન્ડ રન કેસમાં કાયદાની નવી જોગવાઈઓના વિરોધમાં દેશભરના ટ્રક ડ્રાઈવરો અને ટ્રાન્સપોર્ટરોની હડતાળ( Truck Drivers Strike )ને મોટી અસર થઈ રહી છે. મહારાષ્ટ્ર, હરિયાણા, પંજાબ, બિહાર, ઉત્તર પ્રદેશ સહિત દેશભરના ઘણા રાજ્યોમાં હિટ એન્ડ રન કાયદાની કડકાઈના વિરોધમાં રસ્તાઓ બંધ કરવામાં આવ્યા હતા, જેના કારણે પેટ્રોલ-ડીઝલ, દૂધ, ફળ-શાકભાજી અને અન્ય વસ્તુઓનો પુરવઠો ઠપ થઈ ગયો હતો. માલસામાનને અસર થઈ રહી છે.મામલાની ગંભીરતાને જોતા કેન્દ્રીય ગૃહ સચિવ અજય કુમાર ભલ્લા ઓલ ઈન્ડિયા મોટર ટ્રાન્સપોર્ટ કોંગ્રેસ સાથે બેઠક કરશે અને આ મુદ્દે ચર્ચા કરશે.

મોંઘવારી વધવાનો ડર
હડતાલ અને રોડ જામના કારણે માલસામાનનો પુરવઠો પ્રભાવિત થવાના કારણે મોંઘવારી વધવાની પણ શક્યતા છે. ટ્રક હડતાલને કારણે ઘણા રાજ્યોના રસ્તાઓ પર જામ છે. મહારાષ્ટ્રના ખાદ્ય, પુરવઠા અને ગ્રાહક સુરક્ષા વિભાગે પોલીસને વિનંતી કરી છે કે તે સુનિશ્ચિત કરે કે બજારમાં પેટ્રોલ, ડીઝલ અને એલપીજીના પુરવઠાને અસર ન થાય.

450 કરોડના બિઝનેસ પર અસર!
એક રિપોર્ટ અનુસાર, જો ટ્રકોની એક દિવસની હડતાલથી રૂ. 150 કરોડના બિઝનેસને અસર થવાની ધારણા છે, તો ત્રણ દિવસની હડતાલ રૂ. 450 કરોડના બિઝનેસને અસર કરી શકે છે.આ ઉપરાંત આ હડતાળના કારણે દેશના ઘણા શહેરોમાં પેટ્રોલ અને ડીઝલની અછત સર્જાઈ છે. પેટ્રોલ પંપની બહાર પેટ્રોલ લેવા માટે લોકોની લાંબી લાઈનો જોવા મળી રહી છે. પેટ્રોલ પંપ એસોસિએશનના જણાવ્યા અનુસાર 3 દિવસની હડતાળની અસર વ્યાપક જોવા મળી શકે છે. જો હડતાળ ચાલુ રહેશે તો પેટ્રોલ પંપનો સ્ટોક ખતમ થઈ શકે છે.

પેટ્રોલની અછત વચ્ચે લિમિટ નક્કી
ચંદીગઢમાં પેટ્રોલ અને ડીઝલની વધતી જતી અછતને ધ્યાનમાં રાખીને જિલ્લા પ્રશાસને તાત્કાલિક અસરથી વાહનોની ખરીદીની મર્યાદા નક્કી કરી છે. ટુ-વ્હીલર એટલે કે બાઇક માટે 2 લિટર અથવા રૂ. 200નું પેટ્રોલ ખરીદવાની મર્યાદા નક્કી કરવામાં આવી છે, જ્યારે ફોર-વ્હીલર માટે પેટ્રોલ ખરીદવાની મર્યાદા 5 લિટર અથવા રૂ. 500 નક્કી કરવામાં આવી છે. ચંદીગઢના ડીએમના જણાવ્યા અનુસાર, આ નિર્ણય એટલા માટે લેવામાં આવ્યો છે કે જિલ્લામાં પેટ્રોલ અને ડીઝલની કોઈ અછત ન થાય અને લોકોમાં કોઈ સ્પર્ધા ન થાય.