હમ ભી પીછે હટને વાલો મે સે નહિ હૈ!- એરટેલ બાદ વોડાફોન આઈડીયાએ રીચાર્જ પ્લાન્સના ભાવમાં કર્યો તોતિંગ વધારો

એરટેલે(Airtel) તાજેતરમાં તેના ટેરિફ પ્લાનની કિંમતોમાં વધારો કર્યો છે ત્યારબાદ હવે વોડાફોન-આઇડિયા(Vodafone-Idea)એ પણ વિવિધ પ્રીપેડ પ્લાન્સ(Prepaid plans) માટે ટેરિફમાં વધારો જાહેર કર્યો છે. વોડાફોન આઈડિયાએ કહ્યું કે, નવા ટેરિફ 25 નવેમ્બર, 2021થી લાગુ થશે. મૂળભૂત Vodafone Idea પ્રીપેડ પ્લાન એરટેલની જેમ જ રૂ. 99 થી શરૂ થશે. 28 દિવસની માન્યતા સાથે 99 મિનિટનો ટોકટાઈમ, 200MB ડેટા વત્તા 1 પૈસા પ્રતિ સેકન્ડ વોઈસ ટેરિફ ઓફર કરે છે.

આ પ્લાનની કિંમતમાં થયો વધારો:
28 દિવસની વેલિડિટી સાથે પ્રતિદિન 1GB ડેટા મર્યાદા સાથે બંડલ કરાયેલા સૌથી ઓછા પ્લાનની કિંમત 25 નવેમ્બરથી રૂ. 269 થશે. હાલમાં તેની કિંમત 219 રૂપિયા છે. આ સિવાય 84 દિવસની વેલિડિટીવાળા પ્લાનની કિંમત 599 રૂપિયાને બદલે 719 રૂપિયા હશે, જેમાં 1.5 GB પ્રતિ દિવસની ડેટા લિમિટ હશે. 1.5 GB પ્રતિ દિવસની ડેટા મર્યાદા સાથે 365 દિવસનો પ્લાન 20.8 ટકા વધીને રૂ. 2,899 થશે. હાલમાં તેની કિંમત 2,399 રૂપિયા છે.

કંપનીએ લો વેલ્યુ ડેટા ટોપ-અપની કિંમતમાં પણ લગભગ 20 ટકાનો વધારો કર્યો છે. વોડાફોન આઈડિયાની જાહેરાત ભારતી એરટેલ દ્વારા ટેરિફમાં વધારાની જાહેરાત કર્યાના એક દિવસ બાદ આવી છે.

એરટેલે પણ ભાવ વધાર્યા છે:
એરટેલે સોમવારે ટેરિફ વૉઇસ પ્લાન, અમર્યાદિત વૉઇસ બંડલ્સ અને ડેટા ટોપ-અપ સહિત વિવિધ પ્રીપેડ પ્લાન માટે 20-25 ટકા ટેરિફ વધારાની જાહેરાત કરી હતી અને કહ્યું હતું કે નવા દરો 26 નવેમ્બરથી લાગુ થશે. વૉઇસ પ્લાન્સ માટે એન્ટ્રી-લેવલ ટેરિફમાં લગભગ 25 ટકાનો વધારો કરવામાં આવ્યો છે, જ્યારે અમર્યાદિત વૉઇસ બંડલ્સ માટે, મોટા ભાગના કિસ્સાઓમાં લગભગ 20 ટકા જેટલો વધારો કરવામાં આવ્યો છે.

આ દરમિયાન, તમને જણાવી દઈએ કે ટેલિકોમ રેગ્યુલેટર ટ્રાઈ દ્વારા સોમવારે જારી કરવામાં આવેલા ડેટા અનુસાર, ભારતી એરટેલે સપ્ટેમ્બરમાં 2.74 લાખ મોબાઈલ સબસ્ક્રાઈબર્સ ઉમેર્યા અને વોડાફોન આઈડિયાએ મહિના દરમિયાન 10.77 લાખ સબસ્ક્રાઈબર ગુમાવ્યા.