“સાથે જીવશું, સાથે મરશું”: પ્રેમીપંખીડાએ વૃક્ષ પર એકસાથે ગળાફાંસો ખાઈને કર્યો આપઘાત

પંચમહાલ જીલ્લાના ઘોઘંબા તાલુકાના ખરોડ ગામમાં એક ચોંકાવનારી ઘટના સામે આવી છે. ખરોડ ગામના સગીર પ્રેમી અને પ્રેમિકાએ ઝાડ પર એકસાથે ગળેફાંસો ખાઇને આપઘાત કરી લેતાં સમગ્ર પંથકમાં ચકચાર મચી જવા પામ્યો છે. સમાજ તેમના પ્રેમને નહિ સ્વીકારે તેવા ડરથી બંનેએ આપઘાત કર્યો હોય તેવા સમાચાર સામે આવ્યા છે. આ ઘટના અંગેની જાણ થતા રાજગઢ પોલીસ ઘટનાસ્થળે ઘસડી આવી હતી અને આ ઘટના અંગેની વધુ તપાસ હાથ ધરવામાં આવી છે.

ઘોઘંબા તાલુકાના ખરોડ ગામમાં ડામોર ફળીયામાં વસવાટ કરતા સેંગાભાઈ રાઠવાનો સગીર પુત્ર દિવ્યેશ રાઠવા અને ખરોડ ગામના જ ધનભાઇ રાઠવાની સગીર દીકરીના મૃતદેહ તેમના ઘર નજીક ડુંગર તરફ જવાના રસ્તેથી આંબલીના ઝાડ પર લટકતા જોવા મળ્યા હતા. જેને લઈને સમગ્ર ગામમાં ચકચાર મચી જવા પામી હતી. આજે સવારે બંને સગીરના એક જ ઝાડ પર ઓઢણી વડે ગળેફાંસો ખાઈને આપઘાત કરી લીધો હતો જેને જોવા ગામલોકોના ટોળેટોળા ઘટનાસ્થળે દોડી આવ્યા હતા.

બંને મૃતકોની ઓળખ થતા બંનેના પરિવારજનોને જાણ કરવામાં આવી હતી. બંને સગીરના પરિવારજનોના ઘરે માતમ છવાઈ ગયો હતો.  આ સમગ્ર ઘટના અંગેની જાણ થતા જ રાજગઢ પોલીસ તરત જ ઘટના સ્થળે દોડી આવી હતી. ત્યારબાદ મૃતદેહોને ઝાડ પરથી નીચે ઉતારીને પોસ્ટમોર્ટમ માટે સરકારી હોસ્પીટલમાં મોકલી આપવામાં આવ્યા હતા. સાથે જ આપઘાતનો ગુનો નોંધીને આગળની તપાસ હાથ ધરવામાં આવી છે.