બે બાઈક અને ટ્રેલર વચ્ચે ત્રિપલ અકસ્માત સર્જાતા 20 વર્ષીય યુવાનનું ઘટના સ્થળે જ કરુણ મોત

પાટડી(ગુજરાત): આજકાલ વધી રહેલી અકસ્માતની ઘટના દરમિયાન ફરીવાર એક અકસ્માતની ઘટના સામે આવી રહી છે. જેમાં પાટડી તાલુકાના હિંમતપુરાનો યુવાન પોતાના મિત્ર સાથે બાઇકમાં પાટડી જઇ રહ્યો હતો અને માંડલનો યુવાન પોતાની પત્નિ અને બે બાળકો સાથે બાઇક પર આવી રહ્યા હતા. આ દરમિયાન સામેથી સાંઢની માફક આવતા જમ્બો ટ્રેલર અને બે બાઇક વચ્ચે ગમખ્વાર અકસ્માત સર્જાતા હિંમતપુરાના યુવાનનું ઘટનાસ્થળે જ કમકમાટીભર્યુ મોત નિપજ્યું હતુ. આ ઉપરાંત, આ અકસ્માતમાં મહિલા અને બે બાળકો સહિત પાંચ લોકો ઘાયલ થયા હતા. પાટડી પોલિસ દ્વારા ઘટનાસ્થળે દોડી જઇ ફરાર ટ્રેલર ચાલક વિરૂદ્ધ અકસ્માતે મોત અંગેનો ગુન્હો દાખલ કરી કાર્યવાહી હાથ ધરવામાં આવી છે.

મળતી માહિતી મુજબ, પાટડી તાલુકાના હિંમતપુરા ગામનો 20 વર્ષનો કલ્પેશ પ્રહલાદભાઇ ડુમાણીયા પોતાના મિત્ર કિશન સલાભાઇ પાટડીયા સાથે મોટરસાયકલ પર હિંમતપુરાથી પાટડી તરફ આવી રહ્યાં હતા અને સામેથી માંડલ ગામના સંજય વિઠ્ઠલભાઈ ઠાકોર પોતાની પત્નિ રમીલાબેન અને બે બાળકો સાથે મોટરસાયકલ પર આવી રહ્યાં હતા.

આ દરમિયાન સામેથી માંતેલા સાંઢની માફક પુરઝડપે આવતા રાજસ્થાનના ટ્રેલર (નં RJ-27-GD-1654)ના ચાલકે અચાનક સ્ટીયરીંગ પરનો કાબુ ગુમાવી દઇ બંને બાઇકોને અડફેટે લેતા સર્જાયેલા ટ્રીપલ અકસ્માતમાં મોટરસાયકલ પર સવાર હિંમતપુરાના કલ્પેશભાઇ પ્રહલાદભાઇ ડુમાણીયા પર ટ્રેલરના ટાયર ફરી વળતા એને હાથે, પગે અને માથાના ભાગે ગંભીર ઇજાઓ થવાની સાથે છુંદો બોલી જતા એનું ઘટનાસ્થળે જ કમકમાટીભર્યું મોત નિપજ્યું હોવાનું સામે આવ્યું છે.