એક જ દિવસમાં 133 લોકોના મોત, ચીન સિવાય આ દેશમાં પણ કોરોના વાયરસે ભયંકર તબાહી મચાવી

ચીન સહિત વિશ્વના અનેક દેશોમાં કોરોના વાયરસ હજુ થંભવાનું નામ લેતો નથી અને યુરોપનો દેશ ઈટલી હવે કોરોનાની પૂર્ણ ચપેટમાં આવી ગયો છે. એક જ દિવસમાં 133 લોકોના મોત થતા હડકંપ મચી ગયો છે. માત્ર ઈટાલીમાં જ કોરોના વાયરસથી મૃત્યુઆંક 366 સુધી પહોંચી ગયો છે અને નવા 1492 કેસ નોંધાયા છે. કુલ 7375 લોકો કોરોના પોઝીટીવ હેઠળ સારવારમાં છે. ઉતરી ઈટલી લગભગ કોરોનાની ચપેટમાં છે. દેશની સરકારે કોરોનાનો પ્રસાર રોકવા માટે તમામ થિયેટરો- મ્યુઝીયમને બંધ કરવાનો આદેશ આપ્યો છે અને ઉતરી ઈટલી સીલ થયુ છે. મહામારી તરીકે વકરી રહેલા કોરોનાના કારણે સરકારી તંત્રએ 2.2 કરોડ માસ્કનો ઓર્ડર આપ્યો છે. ઈટલી સરકારે વાયરસને ફેલાતો રોકવા માટે દેશભરના ફિલ્મ થિયેટર, સંગ્રહાલયોને બંધ રાખવાનો આદેશ આપ્યો છે.

ઈટાલીમાં સૌથી વધુ મોત ઉત્તર ઈટાલીના લોમ્બાર્ડી ક્ષેત્રમાં થયા છે. ઈટાલીના તમામ 22 ક્ષેત્રમાં કોરોના વાયસના સંક્રમણના મામલા સામે આવ્યા છે. એક જ દિવસમાં સંક્રમણના 1492 કેસ નોંધાયા બાદ ઈટાલીમાં બે કરોડથી વધુ માસ્કના ઓર્ડર આપવામાં આવ્યા છે. ઈટાલીમાં કુલ 7,375 લોકોમાં કોરોના વાયરસની અસરો જોવા મળી રહી છે.

અહી 1.5 કરોડ લોકોને ઘરમાં જ રહેવા આદેશ આપ્યો છે. અહી સ્કુલ, નાઈટ કલબ અને કેસીનો તો અગાઉ જ બંધ કરી દેવામાં આવ્યા હતા. ઉતરી ઈટલીએ સમગ્ર દેશના અર્થતંત્રના એન્જીન જેવું છે. ઈટલીના વડાપ્રધાન ગેઉસ્પે કોન્ટેએ કહ્યું કે દેશ કટોકટીની સ્થિતિમાં સામનો કરી રહ્યું છે. તેઓએ ઉતરી ઈટલીને ‘લોક’ કરવાની તેમને ફરજ પડી હોવાનું સ્વીકાર્યુ છે તથા નાગરિકોને પણ સ્વયંમ જવાબદારી સ્વીકારવા અપીલ કરી છે. ઈટલીના ટુરીસ્ટ ડેસ્ટીનેશન વેનીસ મિલાન મળી તમામ વિદેશી પ્રવાસીઓને પરત જવા જણાવ્યું છે. ઈટલી બાદ ઈરાનમાં પણ કોરોનાનો ખતરો યથાવત છે અને અહી 24 કલાકમાં 49ના મોત થયા છે. આ દેશમાં કુલ મૃત્યુઆંક 200થી ઉપર પહોંચી ગયા છે. ઈરાનના 31 પ્રાંત આ પ્રકારે વાયરસમાં હોમાય છે.