હત્યા કે આત્મહત્યા: જંગલમાંથી બે યુવતીઓના ઝાડ ઉપર લટકતા મૃતદેહ મળ્યા, વિકલાંગ હોવા છતાં ઝાડ પર કેવી રીતે ચડી?

ગુજરાતમાં અવાર-નવાર આપઘાતની ઘટનાઓ સામે આવતી રહે છે. ત્યારે આજે ફરી એક આવી જ એક ઘટના પંચમહાલ જિલ્લામાંથી સામે આવી છે. પંચમહાલ જિલ્લાના ઘોઘંબા તાલુકાના લાલપુરી અને વરવાળા ગામની સીમમાં એરાલ અને ઝોઝ ગામની પિતરાઈ બહેનો સોમવારે મોડી રાત્રે એરાલ ગામમાં લગ્નમાં ગઈ હતી. અને ત્યાર બાદ રહસ્યમય રીતે ગુમ થઇ ગઇ હતી અને આજે વહેલી સવારે અંધારી કોતર પાસે આવેલા કણજના ઝાડ પર ઓઢણીથી ગળેફાંસો ખાધેલી હાલતમાં બન્ને યુવતીઓના મૃતદેહો મળી આવતા સમગ્ર પંથકમાં ચકચાર મચી જવા પામી છે.

હત્યા કે આત્મહત્યા ઘેરાતા રહસ્યો
મળતી માહિતી અનુસાર, એક યુવતી અપંગ હતી. તો તે કઈ રીતે ઝાડ ઉપર ચડી શકી? તેવા સવાલો ઉભા થઇ રહ્યાં છે. આખરે આ આત્મહત્યા છે કે હત્યા તે અંગે રહસ્ય ઘૂંટાઈ રહ્યું છે. જેને લઈને રાજગઢ પોલીસે ઘટનામાં હાલ અકસ્માત મોતનો ગુનો નોંધીને બંને પિતરાઇ બહેનોના મૃતદેહોનું પેનલ પોસ્ટમોર્ટમ કરાવીને યુવતીઓના મૃત્યુનું સાચુ કારણ જાણવા તજવીજ હાથ ધરી છે.

પરિવારજનો પાસેથી મળતી વિગતો અનુસાર, વર્ષા બોડેલી કોલેજમાં અભ્યાસ કરતી હતી જયારે સોનલ ઉર્ફે પીનલ ઘોઘંબાની વરીયા હાઈસ્કૂલમાં અભ્યાસ કરતી હતી. જોકે, બંને આટલા ઊંચા ઝાડ પર ચઢીને આત્મહત્યા કરે તેવી વાત પોલીસના ગળે ઉતરતી નથી. સાથે જ વર્ષા પગે વિકલાંગ હતી, તેથી તે ઝાડ પર કેવી રીતે ચડી શકે. ત્યારે આ રહસ્યમય ઘટના પર પોલીસે તપાસ શરૂ કરી છે.