રાજકોટમાં ચાર દિવસમાં બીજી વખત ચોરીની ઘટના- જુઓ કેવી રીતે સોની બજારમાં ચાર કિલો ચાંદીની થઇ ચોરી

રાજકોટ(ગુજરાત): આજકાલ રાજ્યમાં લુંટના બનાવોમાં સતત વધારો જોવા મળ્યો છે. તસ્કરો લુંટ માટે અવનવા કીમિયા અપનાવતા હોય છે. હવે તો લુંટમાં મહિલાનો સમાવેશ પણ હોય છે. આ દરમિયાન, રાજકોટની બજારમાં ફરી એક વખત દુપટ્ટા ગેંગનો આતંક સામે આવ્યો છે. દુપટ્ટા ગેંગની ચાર જેટલી મહિલાઓ દ્વારા સોની બજારમાં આવેલ શક્તિ જ્વેલર્સમાં ચારથી પાંચ કિલો ચાંદીના દાગીનાના ડબ્બાની ચોરી કરી હોવાની ઘટના સામે આવી છે. આ દરમિયાન, ફરી એક વખત રાજકોટ શહેરની સોની બજારમાં ધોળા દિવસે ચોરીની ઘટના ઘટી હોવાનું સામે આવ્યું છે. જે સમગ્ર ઘટના સીસીટીવી ફુટેજમાં કેદ થવા પામી છે.

મળતી માહિતી અનુસાર, રાજકોટ શહેરની સોની બજારમાં શક્તિ જ્વેલર્સ નામે દુકાન આવેલી છે. જે દુકાનમાં ખરીદીના બહાને ચાર જેટલી મહિલાઓ દુકાનમાં પ્રવેશી હતી. ત્યારબાદ ચાર પૈકી એક મહિલાએ વેપારીને ખરીદી મામલે પોતાની વાતોમાં વ્યસ્ત રાખ્યો હતો. જ્યારે કે અન્ય બે મહિલાઓ દ્વારા ચોથી મહિલા ચોરી કરી શકે અને વેપારીની નજર ચોરી કરતા સમયે મહિલા પર ના પડે તે બતનું ધ્યાન રાખ્યું હતું.

સમગ્ર મામલે ફૂટેજમાં પણ સ્પષ્ટપણે જોઇ શકાય છે કે કઇ રીતે ચોથી મહિલા દ્વારા ચાંદીના દાગીનાની તિજોરીમાંથી ચોરી કરવામાં આવી રહી છે. કઈ રીતે સિફતાઈ પૂર્વક તે ચોરીની ઘટનાને અંજામ આપી રહી છે. સમગ્ર મામલે દુકાનના માલિક અનિલ મૂંધવા દ્વારા એ ડિવિઝન પોલીસ સ્ટેશન માં ફરિયાદ નોંધાવવા બાબતની કાર્યવાહી કરવામાં આવી રહી છે.