હિટ એન્ડ રન કેસ: પાટણમાં પૂરપાટ ઝડપે જતી જીપે કપડાં ધોતી યુવતી અને ખાટલામાં સૂતેલા વૃદ્ધનો લીધો ભોગ

ગુજરાત: પાટણ (Patan) શહેરમાં વહેલી સવારમાં ગાડીચાલકની બેદરકારીને લીધે હિટ એન્ડ રન (Hit and run) ની ઘટના ઘટી હતી કે, જેમાં એકસાથે 2 લોકોનાં મોત થયાં છે. રસ્તા પર જઇ રહેલી ગાડી સાઈડમાં આવેલ ઝૂંપડપટ્ટીમાં ઘૂસી જતાં યુવતી તથા વૃદ્ધને અડફેટે લેતાં બંનેનાં મોત નીપજ્યા હતાં.

સારવાર દરમિયાન બંનેનાં મોત થયાં:
પાટણ શહેરમાં આવેલ અનાવાડા રોડ પર ગુરુવારની સવારે 8 વાગ્યાના સુમારે બેકાબૂ થયેલ માર્શલ ગાડીના ચાલકે પોતાનો સ્ટીયરિંગ પરથી કાબૂ ગુમાવી બેસતાં ગાડી રસ્તા પરથી ઊતરીને પૂરઝડપે અન્નપૂર્ણા સોસાયટીની નજીકમાં આવેલ ઝૂંપટપટ્ટી વિસ્તારમાં ઘૂસી ગઈ હતી.

આની સાથે જ બહાર બેઠેલા 60 વર્ષીય એક વૃદ્ધ તેમજ ઘરની બહાર બાથરૂમમાં કપડાં ધોઈ રહેલી 21 વર્ષની યુવતીને અડફેટે લઈને ફંગોળ્યાં હતાં. ગાડીએ અડફેટે લેતાં બંનેને ગંભીર ઇજાઓ પહોંચતાં સારવાર અર્થે લઈ જવાયાં હતાં કે, જ્યાં સારવાર દરમિયાન બંનેનાં મોત નીપજ્યા હતાં.