સગીરા સાથે દુષ્કર્મ બાદ એસિડ નાંખી હત્યા, ફરીથી થશે પોસ્ટમોર્ટમ

ઉત્તર પ્રદેશના ભદોહી જિલ્લામાં બે દિવસ પહેલા ગુમ થયેલી 17 વર્ષની સગીર યુવતીની લાશ નદીના કાંઠે મળી આવી હતી. સગીર યુવતીના પરિવારજનોએ આરોપ લગાવ્યો છે કે, ગામ નજીક ઇટના ભટ્ટા ઓપરેટરે બળાત્કાર ગુજાર્યા બાદ યુવતીને તેના પર એસિડ ફેકીને મારી નાખી હતી.

આ કેસમાં પોલીસનું કહેવું છે કે, અત્યાર સુધી બળાત્કાર અને હત્યાનો મામલો સામે આવ્યો નથી. હવે બાળકીનું પોસ્ટમોર્ટમ ફરી પાંચ ડોકટરોની પેનલ દ્વારા કરવામાં આવશે. એવું કહેવામાં આવી રહ્યું છે કે, 17 વર્ષની યુવતી ખેતરમાં ઢોર ચરાવતી વખતે અચાનક ગુમ થઈ ગઈ હતી.

આ મામલે પરિવારના સભ્યોની ફરિયાદના આધારે પોલીસે કલમ 363 હેઠળ ગુનો નોંધ્યો હતો અને સગીર યુવતીની શોધખોળ હાથ ધરી છે. આ દરમિયાન સગીર બાળકીનો મૃતદેહ નદીના કાંઠે ઝાડીમાંથી મળી આવ્યો હતો. ડેડબોડી ખરાબ થઈ ગઈ હતી. છોકરી પર એસિડ રેડવામાં આવ્યું હતું.

આ કેસમાં પોલીસ અધિક્ષક રામ બદનસિંહે જણાવ્યું હતું કે, યુવતીનું પોસ્ટ મોર્ટમ મોડી રાત્રે કરવામાં આવ્યું છે. બળાત્કાર અને ખૂનનો મામલો પોસ્ટમોર્ટમ રિપોર્ટમાં હજુ બહાર આવ્યો નથી. પાણીમાં ડૂબીને મોતની વાત સામે આવી છે.