ક્રિકેટર રવિન્દ્ર જાડેજાએ પત્ની રીવાબા જાડેજા માટે માંગ્યા મત- જુઓ વિડીયોમાં શું કહ્યું?

ગુજરાત(Gujarat): ભારતીય ક્રિકેટ ટીમના સ્ટાર ઓલરાઉન્ડર રવિન્દ્ર જાડેજા(Ravindra Jadeja) દ્વારા પત્ની રીવાબા જાડેજા(Rivaba Jadeja) માટે મત માંગવામાં આવ્યા છે. મળતી માહિતી અનુસાર, ભારતીય ક્રિકેટર રવિન્દ્ર જાડેજા દ્વારા સોશિયલ મીડિયા(Social media) પર વિડીયો પોસ્ટ કરીને પત્ની રીવાબાને મત આપવા માટે જામનગર(Jamnagar) વાસીઓને અપીલ કરવામાં આવી હતી.

અત્રે ઉલ્લેખનીય છે કે ભાજપે રવિન્દ્ર જાડેજાની પત્ની રીવાબાને જામનગર ઉત્તર બેઠક પરથી ઉમેદવાર બનાવવામાં આવ્યા છે. સાથે જ રીવાબા આજે ઉમેદવારી ફોર્મ ભરશે. જામનગર ઉત્તર બેઠક પરથી રવીન્દ્ર જાડેજાના પત્ની રીવાબા જાડેજા સવારે 11 વાગ્યે ઉમેદવારી નોંધાવશે. રવિંદ્ર જાડેજાએ પણ સોશલ મીડિયાના મારફતે પત્ની રીવાબા જાડેજાને જંગી લીડથી જીતાડવા માટે લોકોને અપીલ કરી હતી.

રવિન્દ્ર જાડેજાએ પોતાના વિડીયોમાં જામનગરની જનતાને અપીલ કરતા જણાવ્યું હતું કે, મારા વ્હાલા જામનગરવાસીઓ અને તમામ ક્રિકેટ ચાહકો. તમે બધા જાણો જ છો કે ગુજરાત વિધાનસભાની ચૂંટણી અહીં T20 ક્રિકેટની જેમ ઝડપથી આવી રહી છે. ભારતીય જનતા પાર્ટીએ મારી પત્ની રીવાબાને ઉમેદવાર બનાવ્યા છે. તે 14 નવેમ્બરના રોજ ઉમેદવારી પત્ર ભરવા જઈ રહી છે. તેથી વિજયી વાતાવરણ બનાવવાની જવાબદારી તમારા લોકોની છે. તો ચાલો કાલે સવારે મળીએ.