સિંહ ખડ ન ખાય કહેનારા હર્ષદ રીબડીયા વિશેની આ વાત કોઈ નહી જાણતુ હોય, જયારે કેશુભાઈ પટેલ જીત્યા હતા ત્યારે…

વરિષ્ઠ રાજકીય વિશ્લેષક દિલીપભાઈ ગોહિલ: હર્ષદ રિબડિયા વિસાવદર બેઠક માટે ઉમેદવારી પત્રક ભરવા માટેની તૈયારીઓ કરીને મામલતદાર કચેરીએ બેઠા હતા. તેમના માટેનું મેન્ડેટ એટલે કે કૉંગ્રેસના તેઓ સત્તાવાર ઉમેદવાર છે તે માટેનો પત્ર લઈને જૂનાગઢ જિલ્લાના કૉંગ્રેસ પ્રમુખ લીલાભાઈ ખૂંટી પહોંચવાની તૈયારીમાં જ હતા. અચાનક એક ટાબરિયું – ટાબરિયું એટલે નાની ઉંમરનું છોકરું આવ્યું અને ખૂંટીના હાથમાંથી મેન્ટેડનું કાગળિયું લઈને નાસી ગયું.

ખૂટી ત્યાં જ ખોડાઈને જોતા રહી ગયા અને રિબડિયા મામલતદાર કચેરીમાં રાહ જોતા રહી ગયા. વિસાવદરની ચૂંટણી પ્રથમ તબક્કામાં થવાની હતી અને 25 નવેમ્બર ઉમેદવારીપત્રક ભરવાનો છેલ્લો દિવસ હતો. તેમની ઉમેદવારી હવે કૉંગ્રેસના સભ્ય તરીકે થવી મુશ્કેલ બની ગઈ હતી.

લોકો મોં વકાસીને જોઈ રહ્યા કે રાષ્ટ્રીય પક્ષ કૉંગ્રેસની આ હાલત છે. આ વાત 2012ની છે. બાદમાં દોડધામ કરવાનો દેખાવ થયો અને કૉંગ્રેસની કચેરીએથી મામલતદાર કચેરીએ ફેક્સ કરીને ઉમેદવારીપત્રક મોકલવામાં આવ્યું હતું, પણ સ્વાભાવિક છે કે તે કંઈ માન્ય રહે નહીં. (આમાં સાઇડ સ્ટોરી એ પણ છે કે હકીકતમાં છેલ્લી ઘડીએ હર્ષદ રિબડિયાની જગ્યાએ રતિલાલ માંગરોળિયાનું નામ કૉગ્રેસમાં નક્કી થયું હતું. બંને વચ્ચે ટિકિટની ખેંચતાણ હતી અને રિબડિયાનું નામ નક્કી હતું, પણ મેન્ટેડમાં નામ લખાયું હતું રતિલાલ માંગરોળિયાનું. એટલે ટાબરિયું કોનું એ રહસ્ય કાયમ રહસ્ય જ રહ્યું. રતિલાલ માંગરોળિયાએ બાદમાં ગુજરાત હાઈ કોર્ટમાં અરજી કરી હતી કે ટાબરિયાની ગુનાહિત પ્રવૃત્તિને કારણે તેઓ કૉંગ્રેસના ઉમેદવાર તરીકે મેન્ટેડ આપીને ફોર્મ ભરી શક્યા નથી. તેમણે ઉમેદવારી માન્ય કરવા માટે અરજી કરી હતી, પણ શક્ય બન્યું નહોતું. ચૂંટણી અધિકારીઓએ કોર્ટમાં જણાવ્યું હતું કે 13 ડિસેમ્બરે મતદાન માટે 25 નવેમ્બરના રોજ ત્રણ વાગ્યા સુધીમાં મેન્ટેડ આપી દેવું જરૂરી હતું, પરંતુ તે પાંચ મિનિટ મોડું મળ્યું હતું.)

આખો ખેલ વિસાવદરમાં કેશુભાઈ પટેલને સહેલાઈથી જીતાડવા માટેનો હતો. કેશુભાઈ હકીકતમાં પટેલ પાવરની વાત કરીને ઓબીસીના મતો મોદીને અપાવવા માટે મહેનત કરી રહ્યા હતા, પણ કૉંગ્રેસના અબૂધ નેતાઓ એમ સમજતા હતા કે કેશુભાઈને કારણે ભાજપને સૌરાષ્ટ્રમાં ફટકો પડશે. કેશુભાઈની જીપીપી પાર્ટીને ગણીને બે બેઠકો મળી હતી. એક વિસાવદરમાં કૉંગ્રેસની મહેરબાનીથી અને બીજી ધારીની બેઠક મળી હતી.