પતંગના પેચ લડાવવાની બબાલમાં જાહેરમાં જ ખેલાયો ખૂની ખેલ- પાંચ માથાભારે એ વૃદ્ધનું ઢીમ ઢાળી દીધું

ગુજરાતના મહેસાણા (Mehsana, Gujarat) માં વાસી ઉતરાયણના દિવસે પાંચ લોકોએ એક વૃદ્ધને ઘેરીને લોખંડની પાઇપો મારી પતાવી દીધા હતા. મળતી માહિતી અનુસાર પતંગ ચગાવવા મામલે બોલાચાલી થતા પરિસ્થિતિ વણસી હતી અને મોટી બબાલ ઊભી થઈ હતી. ત્યારબાદ આ બબાલે ઉગ્ર સ્વરૂપ ધારણ કર્યું હતું અને મારામારી પર વાત આવતા એક વ્યક્તિનું મોત અને કેટલાય લોકો ઘાયલ થયા હતા.

વાસી ઉતરાયણના દિવસે મહેસાણામાં એક વૃદ્ધની જાહેરમાં જ હત્યાની ઘટના સામે આવી છે. પતંગના પેચ લડાવવા મામલે સોસાયટીના બે જૂથ વચ્ચે સામાન્ય બોલાચારી થઈ હતી, જોતજોતામાં સામાન્ય બોલાચાલી ઉગ્ર ઝઘડામાં પરિણમી… પછી તો ઉતરાયણ છોડી લોકો નીચે આવી ગયા અને એમાંના પાંચ માથાભારે લોકોએ એક વૃદ્ધ વ્યક્તિને ઘેરી લીધા અને ધોકા લાકડી અને લોખંડની પાઇપો મારવા લાગ્યા. આ ઘટનામાં વૃદ્ધ ગંભીર રીતે ઘાયલ થતા સારવાર અર્થે ખસેડવામાં આવ્યા હતા જ્યાં તેમનું મૃત્યુ થયું.

મારામારીનો વિડીયો પણ સામે આવ્યો છે. વીડિયોમાં સાફ સાફ દેખાઈ રહ્યું છે કે સોસાયટીમાં મોટી બબાલ થઈ રહી છે, લોકો લાકડીઓ અને ધોકા મારી રહ્યા છે. આ ઘટનામાં વૃદ્ધ વ્યક્તિનું મોત થતાં ઘટના અંગે પોલીસ સ્ટેશનમાં ફરિયાદ નોંધવામાં આવી છે. પોલીસે ઘટનાની જાણકારી મેળવી વધુ તપાસ હાથ ધરી છે.

આ સમગ્ર ઘટના વાસી ઉતરાયણના દિવસે સાંજના સમયે બની હતી. શહેરના માનવ આશ્રમ ચોકડી પાસે આવેલી ઉમા નગર સોસાયટીમાં રહેતા નાગજીભાઈ વણઝારાની હત્યા થઈ છે. નાગજીભાઈ વણઝારા પોતાના પરિવાર સાથે ટેરેસ ઉપર ઉતરાયણની મજા માણી રહ્યા હતા. તે દરમિયાન એ જ સોસાયટીના પાંચ માથાભારે સાથે પતંગ ચગાવવા મામલે સામાન્ય બોલાચાલે શરૂ થઈ, ત્યારબાદ આ બોલાચાલી ઉગ્ર બનતા બંને જૂથો સામસામે આવી ગયા હતા.