પોરબંદરમાં હડકાયા કૂતરાનો આતંક: આઠ લોકોના હાલ કર્યા બેહાલ- કોઈના હાથે તો કોઈના નાકે ભર્યા બાચકા

હાલમાં પોરબંદરના માધવપૂર ગામ નજીક આવેલ પાતા ગામમાંથી હડકાયેલ શ્વાનનો આતંક સામે આવ્યો છે. શ્વાન હડકાયેલ થતા ગામ અને વાડી વિસ્તારમાં રહેતા લોકો પાછળ બચકા ભરવા દોડ્યું હતું. જાણવા મળ્યું છે કે, આ શ્વાને 8 જેટલા લોકોને બચકા ભર્યા હતા.

જેમાં પાતા ગામના શાંતિબેન કડછાને શ્વાને પગમાં બચકા ભર્યા બાદ નાક ઉપર બચકું ભરી લીધું હતું. જ્યારે આ મહિલાના પતિ કારાભાઈ વાડીમાં આરામ કરતા હતા તે વખતે શ્વાને કારાભાઈના માથા અને હાથમાં બચકા ભરી લીધા હતા.

આ ઉપરાંત, જોધાભાઈ મોહનભાઇ ઓડેદરા તેની દુકાને બેઠા હતા ત્યારે હડકાયેલ શ્વાને કૂદકો મારીને જોધાભાઈના હાથમાં બચકું ભરી લીધું હતું તેમજ વાડી વિસ્તારમાં દેવીબેન ભીમા ઓડેદરા નામના મહિલા કપડા ધોતા હતા તે વખતે શ્વાને આ મહિલાના બાવડામાં બચકું ભરી લીધું હતું. જેથી ઈજાગ્રસ્ત લોકોને સારવાર માટે સિવિલમાં ખસેડવામાં આવ્યા હતા જ્યાં આ લોકોને ટાંકા પણ લેવામાં આવ્યા હોવાનું સામે આવ્યું છે.