પેટ્રોલ મોંઘુ થતા સુરતના લબરમૂછિયા મોજશોખ પુરા કરવા ચડ્યા ચોરીના રસ્તે- જુઓ કેવી રીતે બાઈકની ટાંકી કરી ગયા ખાલી

સુરત(ગુજરાત): સુરતમાં અવાર-નવાર ચોરીની ઘટનાઓ સામે આવતી રહે છે. ત્યારે આજરોજ આવી જ એક અજીબોગરીબ ચોરીની ઘટના સામે આવી છે. સુરતના લિંબાયત વિસ્તારમાં પેટ્રોલ મોંઘુ થતા જુવાનીયાઓ મોજશોખ પુરા કરવા પેટ્રોલની ચોરી કરી રહ્યા છે. આ સમગ્ર ઘટનાના cctv ફૂટેજ સામે આવી રહ્યા છે.

આ CCTVમાં  યુવક ખૂબ જ સિફતપૂર્વક પેટ્રોલ ચોરી કરતા હોવાનું સ્પષ્ટ જોવા મળે છે. બે લબરમુછિયાઓ લોકોની અવરજવર ન હોય અને ગાડી પાર્ક કરી હોય તેવી જગ્યાએથી ચોરી કરતા હોવાનું સામે આવ્યું છે. આજકાલ પેટ્રોલ-ડીઝલના વધી રહેલા ભાવ દરમિયાન ચોરી કરીને સસ્તામાં વેચવાના ગુનાના રવાડે લબરમુછિયા પણ ચડ્યા હોવાનું સુત્રો દ્વારા જાણવા મળ્યું છે.

આ અંગે લિંબાયતના સ્થાનિક મનોહર પાટીલએ કહ્યું કે, અમારા વિસ્તારમાં બે યુવાનો પેટ્રોલ ચોરી કરતાં CCTV કેદ થયા છે. જેમાં એક ગાડીમાંથી બોટલમાં પેટ્રોલ ભરી રહ્યો છે તો અન્ય એક યુવાન કોઈ આવી ન જાય તેના માટેની રેકી કરી રહ્યો હોવાનું સામે આવ્યું છે. આ યુવક સતત આસપાસના વિસ્તારમાંથી કોઈની અવરજવર થાય તો તેના ઉપર ધ્યાન રાખી રહ્યો છે. બીજો યુવક ગાડીમાંથી પેટ્રોલ ભરી રહ્યો છે. CCTVમાં જોવા મળે છે કે, પ્લાસ્ટિકને બોટલમાં પેટ્રોલ ભરાઈ જતા બન્ને યુવકો ત્યાંથી ફરાર થઇ જાય છે.