ઉત્સવ ફેરવાયો માતમમાં: કપડવંજમાં એક સાથે 4 યુવકોની અંતિમ યાત્રામાં લાગણી સભર દ્રશ્યો

ગયા શનિવારે કપડવંજમાં ગણેશ વિસર્જન દરમિયાન અશુભ ઘટના બની હતી, નદીના સંગમ પર એક સાથે 6 યુવકો પાણીમાં તણાયા હતા, જેમાંથી 2 બચી ગયા હતા, પરંતુ 4 યુવકોને બચાવી શકાયા ન હતા, તેમના મૃતદેહ મળી આવતા તેમના પરિવાર પર દુ:ખના ડુંગર તૂટી પડ્યાં છે, શહેરના અંતિસર દરવાજા વિસ્તારમાં રહેતા ચારેય દલિત યુવકોની અંતિમ યાત્રા નીકળી હતી, જેમાં મોટી સંખ્યામાં સ્થાનિક લોકોએ હાજરી આપી હતી, શહેરમાં એક સાથે ચાર યુવકોની અંતિમ યાત્રા નીકળતા આખુ કપડવંજ શોકમય થઇ ગયું હતુ.

શનિવારે વાત્રક, શેઢી અને મહોર નદીના સંગમ પર મોટી સંખ્યામાં લોકો ભગવાન ગણેશજીના વિસર્જન માટે આવ્યાં હતા, તે સમયે શહેરના 6 યુવકો નદીમાં ડૂબ્યાં હતા, જેમાં 4 યુવકોની નદીમાંથી લાશ મળી આવી હતી, ગૌરાંગ વાઘેલા (ઉંમર 27 વર્ષ), નિલેશ વાઘેલા (ઉંમર 18 વર્ષ), પ્રકાશ વાઘેલા (ઉંમર 20 વર્ષ) અને રાહુલ વાઘેલા (ઉંમર 20 વર્ષ)નું નદીમાં ડૂબી જતા મોત થઇ ગયું હતુ, જ્યારે તેઓ ગણેશ વિસર્જન માટે નીકળ્યાં હતા, ત્યારે તેમના પરિવારજનોએ વિચાર્યું પણ નહીં હોય કે તેમના દિકરાઓ હવે ક્યારેય ઘરે પરત નહીં આવે, ભગવાનના વિસર્જનના શુભ અવસરે આવી ઘટનાથી તેમનો પરિવાર આઘાતમાં ડૂબી ગયો છે.