અગમ્ય કારણોસર ભયંકર બલાસ્ટ થતા ઘરના મોભી સભ્યનું થયું કરુણ મોત- પરિવારનો આધાર છીનવાયો

રાજ્યના શામળાજી નજીક આવેલ ગોઢકુલ્લા ગામમાં ભેદી રીતે ભયંકર ધડાકો થયો હતો. જેમાં ઘરના મોભીનું ઘટનાસ્થળ પર મોત નીપજ્યું છે. જ્યારે પત્ની તથા 2 બાળકો ઈજાગ્રસ્ત થયા છે. ત્રણેય ઈજાગ્રસ્ત લોકોને શામળાજીની સરકારી હોસ્પિટલમાં લઈ જવામાં આવ્યા હતા.

ત્યારપછી તેમની સ્થિતિ વધુ ગંભીર જણાઈ આવતા અમદાવાદમાં રીફર કરવામાં આવ્યા હતા. જ્યારે મૃતકનાં મૃતદેહને પોસ્ટમોર્ટમ અર્થે લઈ જવામાં આવ્યો છે. સારવાર દરમિયાન બાળકીનું પણ મોત થયું છે. આ ઘટનામાં સ્થાનિક પોલીસની ટીમની સાથે LCBની ટીમ પણ તપાસમાં જોડાઇ છે. હાલમાં આ અંગેની આગળની તપાસ હાથ ધરાઈ છે. મૃતક યુવક તળાવમાંથી શંકાસ્પદ વસ્તુ ઘરે લાવ્યા બાદ આ ધડાકો થયો હતો.

ઘરના મોભીનું થયું મોત:
મળી રહેલ જાણકારી મુજબ, અરવલ્લી જિલ્લાના ભિલોડા તાલુકામાં આવેલ શામળાજી નજીક ગોઢકુલ્લા ગામમાં ભેદી રીતે ધડાકો થયો હતો. જેમાં 32 વર્ષીય રમેશભાઈ લાલજીભાઈ ફણેજાના ઘરમાં ધડાકો થતાં રમેશભાઇનું મોત થયું છે. ઘરનાં મોભી સભ્યનું મોત થતા તેમની પત્ની તેમજ 2 બાળકો સહિત પરિવારના કુલ 3 લોકોનો આધાર છીનવાઇ ગયો છે. ઘરના બીજા લોકોને પણ ગંભીર ઈજાઓ પહોંચતાં સારવાર અર્થે શામળાજી તેમજ પછી અમદાવાદ લઈ જવામાં આવ્યા છે.

કારણ હજુ પણ અકબંધ:
આ બ્લાસ્ટ અંગે હજુ તપાસ ચાલી રહી છે. આ ધડાકાની પાછળ રહેલ કોઇ ચોક્કસ કારણ સામે આવ્યું નથી. આગળની તપાસ માટે FSLની ટીમને પણ બોલાવીને સમગ્ર મામલે પોલીસ દ્વારા કાયદેસરની કાર્યવાહી હાથ ધરવામાં આવી છે. બ્લાસ્ટનો અવાજ એટલો ભયંકર હતો કે, આજુબાજુના 2 કિમી સુધીમાં સંભળાતા લોકોમાં ભયનો માહોલ સર્જાયો હતો.