ફરીએક વખત ‘માનવતાની હત્યા’: પ્લાસ્ટિકની બોટલમાં ભરીને ફેંકી દીધેલા 13 ભ્રુણ મળ્યા

પાટણ(ગુજરાત): ગર્ભપાત વિરોધી નિયમો અને કાયદાઓ ચોપડા પર જ હોય તેવું લાગી રહ્યું છે. કારણ કે એક પછી એક ભ્રુણ હત્યાના બનાવો જોવા મળી રહ્યા છે. મહીસાગરમાં ગેરકાયદેસર ગર્ભપાતની ઘટના સામે આવ્યા પછી પાટણ જિલ્લાના સિદ્ધપુરના તાવડીયા ગામ નજીકથી પ્લાસ્ટિકના ડબ્બામાંથી માનવ ભ્રુણ મળી આવ્યા છે. ધોળે દિવસે મહીસાગરના સંતરામપુરમાં ગેરકાયદેસર ગર્ભપાતના વીડિયો પછી પાટણના સિદ્ધપુરમાંથી ભ્રુણ મળી આવતા ચકચાર મચી જવા પામી છે. આ ભ્રુણ હત્યા છે કે પછી કોઈ હૉસ્પિટલનો વેસ્ટ છે તે અંગે તપાસ થઈ રહી છે.

મળતી માહિતી અનુસાર, 13 જેટલા ભ્રુણ આજે સિદ્ધપુરના તાવડિયા ગામ નજીક રોડ પરથી પ્લાસ્ટિકના ડબ્બામાંથી મળી આવ્યા હતા. આ જોઈને સૌ કોઈની આંખો ફાટી રહી હતી. લોકોમાં માનવતાના હત્યારાઓ માટે ફિટકાર વરસી રહ્યો હતો. કેટલાક ભ્રુણ તો સ્પષ્ટપણે માનવ ભ્રુણ હોવાની જ વિગતો છે જ્યારે અન્ય ગાંઠ સ્વરૂપ દેખાતા ભ્રુણની ફોરેન્સિક તપાસ કરવામાં આવી છે તે ગાંઠો છે કે ભ્રુણ તેના અંગે પણ અનેક સવાલો ઉભા થઈ રહ્યા છે.