Surat: આંગણામાં કામ કરતી હતી યુવતી, માથે પડ્યો GEB નો મોતનો વાયર- અનેક ફરિયાદ છતાં કંપનીએ રીપેરીંગ નહોતું કર્યું

આજ રોજ સુરત (Surat) શહેરમાં અડાજણ માંથી એક ગામે ગોઝારી ઘટના સામે આવી રહી છે. સુરત શહેરમાં અડાજણના ભાઠા ગામમાં ભાવના નામની મહિલા તેના પરિવાર સાથે રહે છે. તેમના ઘર નજીકથી વીજ લાઈનનો વાયર પસાર થાય છે.

ભાવના ઉપર વીજળીનો તાર પડતા પતિ સહિતના લોકો જીવતી સળગતી હાલતમાં જોતા રહ્યા અને મહિલા બચાવો બચાવોની બૂમો પાડતી રહી હતી. જોકે, ચાલુ વીજલાઈનના કારણે કોઈ બચાવી શક્યું ન હતું. ઘટનાના એક કલાક બાદ મેઈન લાઈન બંધ કરી મૃતદેહ બહાર કાઢવાની ફરજ પડી હતી. છેલ્લા ત્રણ વર્ષમાં 20-25 વર્ષ જૂનો વીજતાર 3-4 વાર તૂટી પડ્યો હોવાનું જાણવા મળ્યું છે.

મૃતક મહિલા ભાવનાના પતિ કનુભાઈ રાઠોડએ જણાવ્યું હતું કે, ચોથીવાર બનેલી ઘટનામાં ભાવનાને જીઈબીની લાઈન ભરખી ગઈ સાહેબ, અમે ગરીબ છીએ અમારું સાંભળશે કોણ. ત્રણ દીકરીઓએ માતા અને મે મારી પત્ની ગુમાવી છે. બસ બેજવાબદાર અધિકારીઓ સામે ગુનો નોંધી સજા થાય એ જ અમારી માગણી છે.

વહેલી સવારે ઘરની બહાર મહિલા કામ કરી રહી હતી. આ દરમિયાન તેમને અચાનક કરંટ લાગ્યો હતો. વીજ કરંટ લાગતા આસપાસના લોકો તેમને બચાવવા બહાર દોડી ગયા હતા. છેલ્લા ઘણા સમયથી વાયર લટકી રહ્યો હતો. GEB ને અનેકવાર લટકતા વાયર ની ફરિયાદ કરવા છતાં કામગીરી કરવામાં આવી ન હતી.