ઘરઆંગણે રમતા ત્રણ વર્ષના બાળકને કારે કચડી નાખ્યો- પરિવારે આંખોનું દાન કરી બીજાના અંધારા જીવનમાં પ્રકાશ પાથર્યો

સુરત(ગુજરાત): સુરતમાં હાલમાં હાઇવે પર અકસ્માતની સંખ્યા સતત વધી રહી છે. અકસ્માત દરમિયાન લાખો લોકો પોતાનો જીવ ગુમાવી રહ્યા છે. ત્યારે કોઈ બીજાની બેદરકારીથી માસુમ લોકો આનો ભોગ બને છે. આ દરમિયાન, સુરતના સિટી લાઈટના સૂર્ય પ્રકાશ રેસિડેન્સી કેમ્પસમાં અજાણ્યા વાહન ચાલકની અડફેટે સાડા ત્રણ વર્ષનું માસુમ બાળક કચડાય ગયું હતું. ગુરુવારની મોડી સાંજે બનેલી આ ઘટના બાદ માસૂમના મૃતદેહને જોઈ પરિવારમાં શોકનો માહોલ છવાઈ ગયો છે.

પીડિત પિતાએ જણાવ્યું હતું કે, ‘અમે દીકરો ગુમાવ્યો છે પણ તેની આંખ કોઈનામાં જીવિત રહેશે, તો અમને જોશે, બસ એ જ અમારી યાદ રહેશે’ તેમ કહી સાડા ત્રણ વર્ષના બાળકની આંખ ડોનેટ કરી હતી. ડો. પ્રફુલ શિરોયાએ જણાવ્યું હતું કે, મૃતક બાળકની આંખો લોક દૃષ્ટિ ચક્ષુ બેંકે સ્વિકારી છે. કારણ કે, બાળકોની આંખો ભાગ્યે દાનમાં આવતી હોય છે. બાળકની દાનમાં મળેલી આંખો કોઈ બે વ્યક્તિની અંધારી દુનિયાને રંગીન જરૂર કરશે.

મનીષ જૈનએ જણાવ્યું કે, ઘટના ગુરુવારની સાંજે બની હતી. માસુમ સેવર કોમ્પ્લેક્સના કંપાઉન્ડમાં બાળ મિત્રો સાથે રમતો હતો. ત્યારબાદ, કોઈ સફેદ કલરની કાર સેવરને કચડીને ભાગી ગઈ હતી. બાળકોના કલ્પાંતને લઈ સોસાયટીવાસીઓ પણ ભેગા થઈ ગયાં હતાં. સેવરને લોહીના ખાબોચિયામાં જોઈ ધ્રુજી ગયાં હતાં. તાત્કાલિક પરિવારને જાણ કરતા આખું પરિવાર દોડીને કેમ્પસમાં આવી ગયું હતું. ઇજાગ્રસ્ત હાલતમાં પુત્રને જોઈ પરિવારના હોશ ઉડી ગયાં હતાં. માથામાં ઇજા થવાથી તબીબો દ્વારા બાળકને મૃત જાહેર કરવામાં આવતા જૈન પરિવાર ધુસ્કે-ધુસ્કે રડી પડ્યું.