ઊંઝા APMCના ચોપડા વિતરણમાં ભ્રષ્ટાચાર, પાછલા બારણે ચોપડાના બોક્સ ગાયબ થતા હોવાનો વિડીયો વાયરલ

દર વર્ષની જેમ આ વર્ષે પણ ઊંઝા ખેતીવાડી ઉત્પન્ન બજાર સમિતિ દ્વારા નોટબુકો તેમજ ચોપડાઓનું વિતરણ કરવામાં આવ્યું હતું જો કે, નવ લાખ જેટલા ચોપડા-નોટબુકો છપાવ્યા હોવા છતાં પણ કેટલાય વિદ્યાર્થીઓ નોટબુકો તેમજ ચોપડાઓ થી વંચિત રહ્યા હતા જેની પાછળ ક્યાંક ને ક્યાંક એપીએમસીની આયોજન વગરની નીતિ જવાબદાર હોવાનું માનવામાં આવી રહ્યું છે કારણ કે અગાઉ ચોપડાઓનું વિતરણ માર્કશીટના આધારે થતું હતું જ્યારે આ વખતે આ વિતરણ કોઈપણ પ્રકારના વિદ્યાર્થી હોવાના ડોક્યુમેન્ટ વગર મન ફાવે તેમ કરવામાં આવ્યું હતું જેથી વ્હાલા-દવાલા ની નીતિ અખત્યાર થઇ હોવાનું ચર્ચાઈ રહ્યું છે.

પ્રાપ્ત વિગતો મુજબ ઊંઝા ખેતીવાડી ઉત્પન્ન બજાર સમિતિ દ્વારા આ વર્ષે નવ લાખ જેટલા ચોપડાઓનું વિતરણ કરવામાં આવ્યું હતું જેમાં તાલુકાના ગામડાઓની પ્રાથમિક શાળાઓમાં આચાર્ય ને ચોપડા નોટબુક વિતરણ ની જવાબદારી સોંપવામાં આવી હતી તો વળી ઊંઝા સ્થાનિક નગરના લોકો માટે એપીએમસીમાં ચોપડા મેળવવા દરરોજ લાંબી લાઈનો લાગતી હતી જોકે ગરમીમાં કલાકો સુધી શેકાયા બાદ માત્ર એક કે બે ડઝન ચોપડા મળતા હતા તો બીજી બાજુ પાછલા બારણેથી આખેઆખા બોક્સ જતા હોવાનો વીડિયો સોશિયલ મીડિયામાં વાઇરલ થતાં ઊંઝા એપીએમસીના ચેરમેન, વાઇસ ચેરમેન તેમજ ડિરેક્ટરો સામે સવાલો ઉઠી રહ્યા છે.