WhatsApp માં આ નંબર પર ફક્ત “Hi” લખો, એટલે માત્ર 24 કલાકમાં થઇ જશે તમારું હેલ્થ ચેકઅપ. જાણો વિગતે

હાલ કોરોનાથી સમગ્ર ગુજરાતની સાથે સમગ્ર ભારત લોકડાઉનમાં ઘરે કેદ થઇ ગયા છે. તેમ છતાં કોરોના કેસોની સંખ્યામાં નહીવત ઘટાડો જોવા મળી રહ્યો છે. લોકોને થોડાક લક્ષણો દેખાતા જ હોસ્પિટલો કે દવાખાનામાં ચેકઅપ કરવા જતા રહે છે, અને તેના કારણે જ અમુક વધારાના લોકો કોરોનાથી સંક્મિત થઇ જાય છે. હવે આવી પરિસ્થતિને પહોંચી વળવા એક નવતર પ્રયોગ હાથ ધરવામાં આવ્યો છે.

અમદાવાદ જિલ્લા પંચાયત દ્વારા એક નવતર પ્રયોગ શરૂ કરવામાં આવ્યો છે. આ નવતર પ્રયોગ અંતર્ગત WhatsApp ઉપર ‘Hi’ કહો કે તરત જ વળતા મેસેજની લીંક પર ફોર્મ ભરવાથી 24 કલાકમાં જ તમારુ હેલ્થ ચેક કરી શકાશે. અમદાવાદ જિલ્લામાં થર્મલ સ્ક્રિનીંગ, હેલ્થ ચેક-અપ, સેનીટાઈઝેશન, શહેરમાંથી લોકોની અવરજવર પર નિયંત્રણ સહિત અનેક રક્ષાત્મક પગલા લેવામાં આવ્યા છે.

જિલ્લા પંચાયતની આરોગ્ય શાખા દ્વારા શરુ કરાયેલા લાઈવ ડેશ બોર્ડ દ્વારા ગ્રામ્ય વિસ્તારમાં ઘર આંગણે જ 24 કલાકમાં લોકોના હેલ્થ ચેક અપની વ્યવસ્થા ઉપલબ્ધ કરતો નવો અભિગમ શરૂ કરાયો છે. અમદાવાદ જિલ્લા વિકાસ અધિકારી અરૂણ મહેશ બાબુએ જણાવતા કહ્યું છે કે, “જિલ્લામાં કોરોનાનું નિયંત્રણ કરવા અનેક પગલા લેવાયા છે. તે પૈકી હેલ્થ ચેક અપ પણ મહત્વનું પાસુ છે. જો કે આટલી મોટી સંખ્યામાં એક સાથે હેલ્થ ચેક અપ કરવું અઘરુ છે ત્યારે આના માટે આરોગ્ય શાખા દ્વારા લાઈવ ડેશ બોર્ડ કાર્યરત કરાયું છે.”