જાણો અલ્પેશ ઠાકોરે કોંગ્રેસમાંથી રાજીનામાં વિશે શું કહ્યું ?

ગુજરાતના રાજકારણમાં એક ચોંકાવનારી વાત સામે આવી રહી છે, જેમાં રાધનપુરના ધારાસભ્ય અલ્પેશ ઠાકોરે એવું કહ્યું છે કે, તેમણે કોંગ્રેસમાંથી રાજીનામું નથી આપ્યું. ઉલ્લેખનીય છે કે, હાલમાં કોંગ્રેસ પાર્ટીએ અલ્પેશ ઠાકોરનું ધારાસભ્ય પદ રદ્દ કરવા માટે ગુજરાત હાઇકોર્ટમાં અરજી કરી છે, જેની આજે સુનાવણી થઇ હતી, પરંતુ કોર્ટમાં અલ્પેશ ઠાકોરે એફિડેવિટ રજૂ કરી તેમાં એવું કહ્યું હતું કે, તેમણે કોંગ્રેસમાંથી રાજીનામું આપ્યું જ નથી.

ઉલ્લેખનીય છે કે, લોકસભાની ચૂંટણી પહેલા જ અલ્પેશ ઠાકોરે કોંગ્રેસમાંથી રાજીનામું આપી દીધું છે, તેવી વાત સામે આવી હતી. આ સિવાય અલ્પેશે કોંગ્રેસ વિરુદ્ધ પણ કેટલાય સ્ટેટમેન્ટ આપ્યા હતા અને જેને કારણે કોંગ્રેસ પાર્ટીએ અલ્પેશ ઠાકોરનું ધારાસભ્ય પદ રદ્દ કરવા માટે કોર્ટમાં અરજી કરી હતી.

એટલે અલ્પેશ ઠાકોરે ગુજરાત હાઇકોર્ટમાં એફિડેવિડ રજૂ કરી હતી. સૂત્રો મુજબ એફિડેવિટમાં કહેવામાં આવ્યું હતું કે, કોંગ્રેસે કથિત રાજીનામાનો સ્વીકાર કે અસ્વીકાર પણ કર્યો નથી. સોશિયલ મીડિયાના માધ્યમથી તેનું ફરતું થયેલું રાજીનામું કાયદેસરનું રાજીનામું ગણી શકાય નહીં અને તેના આધારે તેની સામે ધારાસભ્ય પદેથી ગેરલાયક ઠેરવવાની કાર્યવાહી પણ થઈ શકે નહીં.