હવે દરેક ચારધામ તીર્થયાત્રીઓને મળશે એક લાખનો ‘અકસ્માત વીમો’

કેદારનાથ(Kedarnath), બદ્રીનાથ(Badrinath), ગંગોત્રી(Gangotri) અને યમુનોત્રી(Yamunotri)માં અકસ્માતના કિસ્સામાં ચાર ધામ યાત્રા (Char Dham Yatra) ના યાત્રિકોને ₹1 લાખનું વીમા કવરેજ (Insurance coverage) આપવામાં આવશે. ઉત્તરાખંડના પ્રવાસન અને સંસ્કૃતિ મંત્રી સતપાલ મહારાજ દ્વારા સ્થાપિત આધ્યાત્મિક સંસ્થા માનવ ઉત્થાન સેવા સમિતિ વતી યુનાઈટેડ ઈન્ડિયા ઈન્સ્યોરન્સ કંપની લિમિટેડે આ જાહેરાત કરી છે.

ઉત્તરાખંડના મંત્રીએ કહ્યું કે ચાર ધામ તીર્થયાત્રીઓને તેમના પિતા હંસજી મહારાજ અને માતા રાજ રાજેશ્વરીજીની પવિત્ર સ્મૃતિમાં અકસ્માતની સ્થિતિમાં વીમા કવરેજ આપવામાં આવે છે. કેદારનાથ-બદ્રીનાથ મંદિર સમિતિના પ્રમુખ અજેન્દ્ર અજયે મંત્રી અને માનવ ઉત્થાન સેવા સમિતિનો આભાર વ્યક્ત કર્યો છે.

3 મેના રોજ ચાર ધામ યાત્રા શરૂ થઈ ત્યારથી અત્યાર સુધીમાં 110 થી વધુ યાત્રાળુઓના મૃત્યુ મુખ્યત્વે વિવિધ રોગોના કારણે થયા છે. ઉત્તરાખંડના આરોગ્ય મહાનિર્દેશક (ડીજી) શૈલજા ભટ્ટે નોંધાયેલા મૃત્યુ પાછળનું મુખ્ય કારણ ‘હાર્ટ એટેક’ ગણાવ્યું હતું. અધિકારીઓએ ચારધામ યાત્રાના રૂટ પર 169 ડોકટરોની વધારાની તૈનાતી અંગે પણ માહિતી આપી હતી.

બદ્રીનાથ-કેદારનાથ મંદિર સમિતિના જણાવ્યા અનુસાર, રવિવારે (12 જૂન) 19 લાખથી વધુ શ્રદ્ધાળુઓએ ચાર ધામ યાત્રા કરી હતી, જેમાંથી કુલ 19,04,253 તીર્થયાત્રીઓ ઉત્તરાખંડ ચારધામ પહોંચ્યા હતા. 8 મેથી 11 જૂનની સાંજ સુધીમાં 6,57,547 શ્રદ્ધાળુઓ બદ્રીનાથ પહોંચ્યા હતા, જ્યારે 6 મેથી 11 જૂન સુધીમાં 6,33,548 શ્રદ્ધાળુઓ કેદારનાથ પહોંચ્યા હતા.