વધારે પડતું મીઠાનું સેવન સ્વાસ્થ્ય માટે છે ધીમું ઝેર – આજથી જ થઇ જાજો સાવચેત

શરીરને સ્વસ્થ(Healthy) રાખવા માટે દરરોજ વિવિધ પ્રકારના પોષક તત્વો(Nutrients) અને ખનિજોની મધ્યમ માત્રામાં જરૂર હોય છે. આ બંને પોષક તત્વોની ઉણપ અથવા વધારે માત્રા થવાથી ગંભીર સ્વાસ્થ્ય સમસ્યાઓ થઈ શકે છે. સોડિયમ પણ આવું જ એક આવશ્યક તત્વ છે. સોડિયમને મીઠા (salt)નું મુખ્ય ઘટક માનવામાં આવે છે. શરીરમાં તેની ઉણપ અથવા વધુ પડવું, બંને અનેક પ્રકારની સ્વાસ્થ્ય સમસ્યાઓને જન્મ આપી શકે છે.

જ્યારે મીઠાનું વધુ પડતું સેવન બ્લડ પ્રેશર વધારવા અને ગંભીર પરિસ્થિતિઓમાં હૃદયના રોગોનું જોખમ વધારવા માટે જાણીતું છે, ત્યારે તેની ઉણપથી શરીરમાં ગંભીર નબળાઈ અને થાકનો અનુભવ થઈ શકે છે.

સંશોધન દર્શાવે છે કે જે લોકો વધુ પડતું મીઠું ખાય છે તેઓને હૃદયની બીમારીઓ તેમજ મગજને લગતી વિવિધ તકલીફો થઈ શકે છે. આ જ કારણ છે કે નિષ્ણાતો તમામ લોકોને તેનો નિયંત્રિત માત્રામાં વપરાશ સુનિશ્ચિત કરવાની સલાહ આપે છે. જોકે આ માટે મીઠાનું સેવન બિલકુલ બંધ ન કરવું જોઈએ. આમ કરવાથી તમારી મુશ્કેલીઓ પણ વધી શકે છે.

સોડિયમનું કેટલું સેવન કરવું જોઈએ?
હેલ્થ એક્સપર્ટ્સનું કહેવું છે કે, દરેક લોકોએ દરરોજ સોડિયમની માત્રા પર ખાસ ધ્યાન આપવું જરૂરી છે. અમેરિકન હાર્ટ એસોસિએશનના નિષ્ણાતોના જણાવ્યા અનુસાર, એક દિવસમાં મહત્તમ 2,300 મિલિગ્રામ અથવા લગભગ 1 ચમચી મીઠું ખાઈ શકાય છે. ધ્યાનમાં રાખો, તેની ઉણપ અને વધુ પડવું બંને નુકસાનકારક છે. ઘણા પેકેજ્ડ અથવા જંક ફૂડમાં મીઠાનું પ્રમાણ વધુ હોય છે, તેથી તેના વપરાશ અંગે ખાસ કાળજી લેવી જોઈએ.