હનુમાન જયંતિના પર્વે સુરતમાં હનુમાનજીને ધરાવાયો 4500 કિલોનો વિશાળ લાડુ

સુરત(surat): આજના દિવસે દેશભરમાં હનુમાન જન્મોત્સવની ભવ્ય ઉજવણી જોવા મળશે. ત્યારે સુરતમાં હનુમાન જયંતિની ઉજવણીના ભાગરૂપે મંદિરોમાં તડામાર તૈયારીઓ શરૂ કરી દેવામાં આવી છે. સુરતના પાલ ખાતે આવેલા અટલ આશ્રમ હનુમાનજી મંદિરે હનુમાન જયંતિની વિશેષ ઉજવણીના ભાગરૂપે આ વર્ષે 4500 કિલોનો વિશાળ સવામણી લાડુ પ્રસાદ માટે બનાવવામાં આવ્યો છે. જેને લઈને મંદિરમાં તડામાર તૈયારીઓ કરવામાં આવી રહી છે. અટલ આશ્રમ ખાતે આ રીતની ઉજવણી છેલ્લા 2004થી કરવામાં આવે છે. વર્ષ 2004માં 551 કિલોનો લાડુ બનાવવામાં આવ્યો હતો, જે આ વર્ષે 4500 કિલો સુધી પહોંચ્યો છે.

હનુમાન જયંતિની ધામધુમથી ઉજવણી 
દેશભરમાં આજે હનુમાનજી જન્મોત્સવની ભવ્ય ઉજવણી કરવામાં આવી રહી છે. ત્યારે સુરત શહેર પણ આ ઉજવણીમાંથી બાકાત રહ્યું નથી. સુરત શહેરમાં આવેલા વિવિધ મંદિરોમાં ઉત્સાહભેર તૈયારીઓ કરવામાં આવી છે. મંદિરોની અંદર રામધૂન, સુંદરકાંડના પાઠ, મહાપૂજા, મહાઆરતી, ભંડારા સહિતના આયોજનો કરવામાં આવ્યા છે.

આજે વહેલી સવારથી જ મંદિરોમાં ભક્તોનું ઘોડાપૂર ઉમટી પડ્યું છે અને મંદિરો જય બજરંગ બલીના નાદ સાથે ગુંજી ઉઠ્યું છે. ત્યારે સુરતના પાલ ખાતે આવેલા અટલ આશ્રમ ખાતે પણ હનુમાન જન્મોત્સવની વિશેષ ભવ્ય ઉજવણી કરવામાં આવી રહી છે. જેને લઈને છેલ્લા 3 દિવસથી અટલ આશ્રમમાં તડામાર તૈયારીઓ કરવામાં આવી રહી હતી. અહીં આ વર્ષે 4500 કિલોનો વિશાળ સવામણી લાડુના પ્રસાદનો ભોગ હનુમાન દાદાને ધરવામાં આવ્યો છે. જે પ્રસાદ રૂપે આપવામાં આવશે.