સુરતની મજૂરા બેઠક પર કેસરિયો લહેરાયો, હર્ષ સંઘવીનો ભવ્ય વિજય- અન્ય તમામ ઉમેદવારની ડીપોઝીટ જપ્ત

ગુજરાત(Gujarat): રાજ્યની વિધાનસભાની ચૂંટણીમાં ભાજપે સ્પષ્ટ બહુમતી મેળવી છે, તો આમ આદમી પાર્ટીએ 2024 માટે અત્યારથી જ પ્રવેશ મેળવી લીધો છે. મહત્વનું છે કે, કોંગ્રેસના અશોક ગેહલોતનો જાદુ ન ચાલ્યો, તો રાહુલ ગાંધીના ભારત જોડો યાત્રાથી પણ કંઈ ફળ્યું નહી. ત્યારે ગુજરાતમાં 150 + બેઠકો પર હાલ ભાજપ લીડ કરી રહ્યું છે.

મહત્વનું છે કે, ગુજરાત વિધાનસભાની ચૂંટણી પૂર્ણ થયા બાદ દરેકની નજર સુરતની મજૂરા વિધાનસભા બેઠકના ચૂંટણીના પરિણામ પર હતી. કારણ કે, આ બેઠક પર ગૃહ રાજ્યમંત્રી હર્ષ સંઘવી ચૂંટણી મેદાને હતા. ઉલ્લેખનીય છે કે, 2008નાં સીમાંકન બાદ અસ્તિત્વમાં આવેલી મજૂરા બેઠક એ ગુજરાતના ગૃહપ્રધાન હર્ષ સંઘવીનો મતવિસ્તાર હોવાથી આ બેઠકને હાઈ પ્રોફાઈલ માનવામાં આવતી હતી. આ બેઠક પર હર્ષ સંઘવીની સામે કોંગ્રેસે બળવંત જૈનને મેદાનમાં ઉતાર્યા હતા. તો આમ આદમી પાર્ટી દ્વારા PVS શર્માને ટિકિટ આપવામાં આવી હતી.

3 ઉમેદવારોની ડિપોઝિટ જપ્ત:
અત્રે ઉલ્લેખનીય છે કે, હર્ષ સંઘવીનો 1,15,422 મતોની ભવ્ય લીડથી વિજયી થયા છે. અન્ય તમામ 3 ઉમેદવારોની ડિપોઝિટ જપ્ત થયાનો અદ્વિતીય બનાવ મજૂરા વિધાનસભામાં નોંધાયો છે.

182 વિધાનસભા બેઠકોનું આજે પરિણામ:
ગુજરાત વિધાનસભાની કુલ 182 વિધાનસભા બેઠકો છે. જેમાં ઉત્તર ગુજરાતની 32 બેઠકો, દક્ષિણ ગુજરાતની 35 બેઠકો, મધ્ય ગુજરાતની 61 અને સૌરાષ્ટ્ર-કચ્છની 54 બેઠકો સામેલ છે.