આગામી 3 દિવસ ગુજરાતના આ વિસ્તારોમાં ભરશિયાળે ભુક્કા બોલાવશે વરસાદ- હવામાન વિભાગની આગાહી

ગુજરાત(Gujarat): રાજ્યમાં હવે ધીરે-ધીરે ઠંડીનું જોર વધી રહ્યું છે. ત્યારે રાજ્યમાં કડકડતી ઠંડી વચ્ચે માવઠાની આગાહી હવામાન વિભાગ દ્વારા કરવામાં આવી છે. ભરશિયાળે 12, 13 અને 14 ડિસેમ્બર એમ ત્રણ દિવસ દક્ષિણ ગુજરાતમાં માવઠાની આગાહી કરવામાં આવી છે, તો ભાવનગરમાં પણ 14મી ડિસેમ્બરે કમોસમી વરસાદની સંભાવના છે અને 5 દિવસ બાદ ફરી ઠંડીનું જોર વધશે.

હવામાન વિભાગની આગાહી અનુસાર, આગામી 12, 13 અને 14 તારીખે દક્ષિણ ગુજરાતમાં કમોસમી વરસાદ ખાબકી શકે છે. ત્યારબાદ 14 ડિસેમ્બરે ભાવનગરમાં પણ કમોસમી વરસાદ પડી શકે છે. દક્ષિણ ગુજરાતના નવસારી અને વલસાડમાં પણ વરસાદ પડે તેવી શક્યતાઓ સેવાઈ રહી છે. બીજી તરફ નલિયામાં સૌથી ઓછું 8.8 ડિગ્રી તાપમાન નોંધાયું છે, જયારે અમદાવાદમાં 15 ડિગ્રી તાપમાન નોંધાયું છે.

આગામી 5 દિવસને લઈને હવામાન વિભાગ દ્વારા આગાહી કરવામાં આવી છે કે, આગામી 3 દિવસ રાજ્યમાં કમોસમી હળવો વરસાદ ખાબકી શકે છે. આગામી 12 અને 13 ડિસેમ્બરના રોજ દક્ષિણ ગુજરાતમાં અત્યંત સામાન્ય વરસાદ ખાબકી શકે છે. હાલ સાંજ પડે ત્યારબાદ સુસવાટા મારતો પવન ફૂંકાતા ઠંડીનું જોર વધવા લાગ્યું છે. ત્યારે હવે ગુજરાતમાં ઠંડીનું જોર એકાએક વધવાની શક્યતા રહેલી છે અને સાથે વરસાદની પણ સંભાવનાઓ રહેલી છે.

ખાસ કરીને જો વાત કરવામાં આવે તો મધ્ય, ઉત્તર અને દક્ષિણ ગુજરાતમાં કાતિલ ઠંડી પડશે. આગામી 3 દિવસ રાજ્યના વાતાવરણમાં પલટો આવવાની શક્યતાઓ છે. તો 3 દિવસ બાદ વાદળછાયું વાતાવરણ જોવા મળશે તેવી શક્યતાઓ પણ સેવાઈ રહી છે. બંગાળની ખાડીમાં લો પ્રેશર સિસ્ટમ સક્રિય હોવાથી કડકડતી ઠંડીની આગાહી કરવામાં આવી છે. ગુજરાતમાં ઠંડીનું જોર એકાએક વધવાનું છે તેવી આગાહી હવામાન વિભાગ દ્વારા કરવામાં આવી છે.