ભાજપ કોંગ્રેસ બાદ પોતાને સંસ્કારી કહેતા AAP ના નેતાઓએ પણ ‘ઝળકાવ્યા લખણ’- જાણો વિગતવાર

આજે આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલ અમદાવાદની મુલાકાતે છે, આ દરમ્યાન ઘણા દિગ્ગજ  ચહેરાઓએ આપ માં એન્ટ્રી લીધી. આ દરમ્યાન ઘણા એવા કિસ્સાઓ બન્યા જેને લઈને પોતાને સંસ્કારી પાર્ટી ગણાવતી આમ આદમી પાર્ટીની પોલ ખુલી ગઈ હતી. કોરોના મહામારીના આ સમયમાં નિયમોનો કચ્ચર ઘાણ કરનાર અરવિંદ કેજરીવાલ એન્ડ કંપની ની ટીકાઓ પણ થઇ રહી છે.

અમદાવાદ એરપોર્ટથી અરવિંદ કેજરીવાલ અમદાવાદ સર્કિટ હાઉસ પહોંચ્યા હતા. સર્કિટ હાઉસ અનેક કાર્યકર્તાઓ કેજરીવાલના સ્વાગત માટે આવ્યા હતા. કેજરીવાલ આવતા જ અનેક કાર્યકરો સ્વાગત માટે ઉમટી પડ્યા હતા. સ્વાગત કરવા જતાં કાર્યકરો કોરોના અને સોશિયલ ડિસ્ટન્સના નિયમો અને માસ્ક પણ સરખું પહેરવાનું ભૂલ્યા હતા. કાર્યકરોએ ઉત્સાહમાં કેજરીવાલનું સ્વાગત કર્યું પરંતુ મોટી સંખ્યામાં ટોળાના સ્વરૂપે પણ ભેગા થયા હતા જે હાલની પરિસ્થિતિમાં હિતાવહ નથી.

એરપોર્ટના સ્વાગત બાદ સર્કિટ હાઉસમાં કાર્યકરોએ સાથે મળીને ફોટો સેશન પણ કરાવ્યું હતું, પરંતુ તેમાં પણ તમામ લોકો નિયમો નેવે મૂકીને ફોટા પડાવતા નજરે પડ્યા હતા. તમામ લોકો એકબીજાથી અંતર જાળવ્યા વિના જ ફોટા પડાવી રહ્યા હતા. ખુદ પોતાને નિયમ કાયદાના જાણકાર ગણાવતા ગોપાલ ઈટાલીયાનું માસ્ક પણ ઘણી તકે ઉતરી ગયેલું હતું.