BJP-AAP સામ સામે: મહેશ સવાણીએ સી.આર.પાટીલ પર લગાવ્યા ગંભીર આક્ષેપ કહ્યું કે… 

આગામી ૨૦૨૨ની વિધાનસભાની ચૂંટણીને લઈને આમ આદમી પાર્ટી લોકોની વચ્ચે જઈને લોકોની વાત સાંભળી રહી છે. આમ આદમી પાર્ટીના પ્રદેશ અધ્યક્ષ ગોપાલ ઈટાળીયા, ઇસુદાન ગઢવી, મહેશ સવાણી અને પ્રવિણ રામ ગામડે ગામડે જઈને લોકોના પ્રશ્નો સાંભળી રહ્યા છે અને ગામડે ગામડે જન સંવેદના મુલાકાત કરી રહ્યા છે.

છેલ્લા કેટલાક સમયથી આમ આદમી પાર્ટી અને ભારતીય જનતા પાર્ટીના નેતાઓ વચ્ચે ઘણા વિવાદો ચાલી રહ્યા છે. સૌરાષ્ટ્રના જન સંવેદના કાર્યક્રમ દરમિયાન આમ આદમી પાર્ટીના નેતા પર હુમલો કરવામાં આવ્યો હતો. ત્યારબાદ ઘણા બધા લોકો આમ આદમી પાર્ટીની લોકપ્રિયતાને જોઈને આમ આદમી પાર્ટીમાં જોડાઈ રહ્યા છે અને આમ આદમી પાર્ટીનો ખેસ ધારણ કરી રહ્યા છે.

સૌરાષ્ટ્ર પ્રવાસ દરમિયાન મહેશ સવાણીની ગાડી પર અમુક અસામાજિક તત્વો દ્વારા હુમલો કરવામાં આવ્યો હતો. ત્યારે મહેશ સવાણીએ કહ્યું હતું કે, અમારા પર ફેકવામાં આવેલ પથ્થરોનો ઉપયોગ સ્મારક બનાવવા માટે કરીશું. સાથે મહેશ સવાણીએ પોતાના રાજકીય જીવનથી લઈને સી.આર.પાટીલની વાત કરી હતી.

મહેશ સવાણીએ વધુમાં જણાવતા કહ્યું છે કે, મેં સૌરાષ્ટ્રનો પ્રવાસ કર્યો તે અંગે ભાજપના લોકોને ખુબ જ રોષ ભરાયેલો છે. કોરોનાકાળ દરમિયાન તેઓ મારી સાથે ખરાબ વર્તન કરતા હતા અમે લોકોની સેવા અને મદદ કરવા માટે સુરતથી સૌરાષ્ટ્ર પહોચ્યા હતા.