૧૬ કરોડનું ઈન્જેકસન આપવા છતાં ૧૧ મહિનાની બાળકીએ લીધા અંતિમશ્વાસ- પરિવારનું એકનું એક ફૂલ મુરજાયું

હજારો લોકોની પ્રાર્થના અને 16 કરોડનું ઈન્જેક્શન આપવા છતાં પણ 11 મહિનાની વેદિકા શિંદેનો જીવ બચી શક્યો નથી. શ્વાસ લેવામાં મુશ્કેલી થતા રવિવારે રાત્રે વેદિકાને પુણેની ખાનગી હોસ્પિટલમાં દાખલ કરવામાં આવી હતી, જ્યાં મોડી રાત્રે તેમનું અવસાન થયું હતું.

મહારાષ્ટ્રના પિંપરી ચિંચવાડમાં રહેતા સૌરભ શિંદેની પુત્રીને સ્પાઇનલ મસ્ક્યુલર એટ્રોફી (SMA) નામનો આનુવંશિક રોગ હતો. માતાપિતાએ ક્રાઉડ ફંડિંગમાંથી 16 કરોડ રૂપિયા જમા કરાવીને અમેરિકાથી ઝોલ્જેન્સમા નામનું ઈન્જેક્શન મેળવ્યું હતું. જેને આ રોગનો છેલ્લો ઉપાય માનવામાં આવે છે.

વેદિકાને પહેલા પણ આ ઈન્જેક્શન આપવામાં આવ્યું હતું. ત્યાર પછી આખો પરિવાર ખૂબ ખુશ હતો તેમજ વેદિકાની વાર્તા સોશિયલ મીડિયામાં પણ ખૂબ વાયરલ થઈ રહી હતી. પરંતુ ભગવાનથી આ ખુશી જોવાય નહી તેવું લાગે છે. રવિવારે રાત્રે વેદિકાએ દુનિયાને અલવિદા કહી દીધું હતું. આ રીતે વેદિકાના ગયા પછી, તેને અને પરિવારને મદદ કરનાર બધા લોકો ભારે આઘાતમાં હતા. બધા લોકો સવાલ ઉઠાવી રહ્યા છે કે, 16 કરોડનું ઈન્જેક્શન આપ્યા છતાં પણ વેદિકાનું મૃત્યુ કેવી રીતે થયું?