સુરતમાં જાહેરમાં દારૂની રેલમછેલ: રાત્રી કરફ્યુ દરમ્યાન પોલીસ સ્ટેશનની હદમાં ખુલ્લેઆમ વેચાણ- જુઓ live વિડીયો

ગાંધીના ગુજરાતમાં આમ તો દારૂ બંધી છે અને અહીંયા દારૂના વેચાણ પર પણ પ્રતિબંધ છે. તેમ છતાં અહી દારૂનું ખુલ્લેઆમ વેચાણ થાય છે. આ ઉપરાંત દક્ષિણ ગુજરાત દારૂના વેપારનું સૌથી મોટું હબ કહેવામાં આવે છે. આ દરમિયાન સુરતમાં જાહેરમાં દારૂનું વેચાણ થતું હોવાની અનેક ફરિયાદો સામે આવી રહી છે.

તાજેતરમાં જ સુરતના લીબાયત અને ડિંડોલીમાં જાહેરમાં શાકભાજી માર્કેટની જેમ દારૂનું વેચાણ થતું હોવાની સાથે સુરતના પાંડેસરા અને ઉધના વિસ્તારમાં મોપેડમાં બૂટલેગર દારૂ લઈએ જતા હોવાનો વીડિયો સોશિયલ મીડિયામાં વાયરલ થતા પોલીસ દ્વારા કાર્યવાહી શરૂ કરવામાં આવી છે. ગુજરાતમાં દારૂના ખાનગી વેચાણ પર પ્રતિબંધ હોવા છતાં જાહેરમાં દારૂનું વેચાણ થતું હોવાની સતત ફરિયાદ સામે આવે છે.

પોલીસ દ્વારા આવા બૂટલેગરોને જાણે પરવાનગી આપી દેવામાં આવી હોય તેવી પરિસ્થિતિ સર્જાઈ છે. આ દરમિયાન સુરત પોલીસ દારૂનું ગેરકાયદેસર વેચાણ ન થતું હોવાનું કહેતા હોય છે. ત્યારે સુરતના લીંબાયત વિસ્તારમાં જાહેરમાં અને તેમાં પણ શાકભાજી માર્કેટમાં ખુલ્લેઆમ શાકભાજીની જેમ જાહેરમાં દારૂનાં વેચાણનો વીડિયો વાઇરલ થતા આ અંગે જાગૃત નાગરિક દ્વારા વીડિયો સાથે લેખિતમાં પોલીસ ફરિયાદ કરવામાં આવી છે.

એકબાજુ જયારે કોરોનાને લઈને રાત્રે કર્ફ્યું જાહેર કરવામાં આવેલ છે. ત્યારે લોકો રાત્રી કર્ફ્યુંનું પાલન કરતા હોય છે, પરંતુ, અહીંયા રાત્રી કર્ફયૂ વચ્ચે જાહેરમાં દારૂનાં વેચાણનો વીડિયો વાયરલ થતા પોલીસ દ્વારા તેની સામે કાર્યવાહી શરુ કરવામાં આવી હતી. સતત આ વિસ્તારમાં જાહેરમાં દારૂના વેચાણને લઈને પોલીસ અનેક વખત વિવાદમાં આવી હોવાનું સામે આવ્યું છે.