સ્પાની આડમાં ચાલતા ગોરખધંધા, ત્રણ વિદેશી યુવતીઓ ઝડપાતા સનસનાટી

અમદાવાદમાં ફરી એક વખત પોલીસે સ્પા પર દરોડા પાડ્યાં છે. થલતેજ ગુરુદ્વારા પાછળ આવેલા અક્ષર સ્ટેડિયામાં ચાલતા ધ હેરિટેજ વેલનેસ સ્પામાં વસ્ત્રાપુર પોલીસે દરોડા કર્યા હતા. જેમાં વિઝાના નિયમોનું ઉલ્લંઘન કરીને અહી કામ કરી રહેલી ત્રણ થાઇલેન્ડની યુવતીઓની ધરપકડ કરી છે. સ્પા સેન્ટરના માલિક સાગર પંચાલ અને અન્ય બે મહિલાઓની પણ ધરપકડ કરી છે.

મળેલી બાતમીના આધારે પોલીસે ત્યાં દરોડા પાડ્યા હતા, જોકે દેહવ્યાપાર ચાલતો હોવાના કોઇ પુરાવા પોલીસને હાથ લાગ્યા હતા નહોતા. સ્પા સેન્ટરમાં સંચાલક, મેનેજર, થાઇલેન્ડની ત્રણ યુવતી સહિત અન્ય બે યુવતી અને બે યુવક કામ કરતાં હતાં. પોલીસે થાઇલેન્ડની તમામ યુવતીઓની પૂછપરછ કરી હતી અને તેમના પાસપોર્ટ અને વિઝા ચેક કર્યા હતા. પોલીસે યુવતીઓના વિઝા ચેક કરતાં તેઓ બિઝનેસ વિઝા પર આવેલી હોવાનું સામે આવ્યું હતું. ‌બીઝનેસ વિઝા પર આવેલી હોવા છતાંય તે સ્પામાં નોકરી કરતી હોવાથી પોલીસે તેમના વિરુદ્ધમાં કાર્યવાહી કરી છે.