આને કહેવાય પ્રામાણિકતા! રીક્ષાચાલકે લાખો રૂપિયાથી ભરેલ બેગ મૂળ માલિકને કર્યું પરત

આજના સમયમાં ભાગ્યે જ કોઈ વ્યક્તિ પ્રામાણિક જોવા મળતો હોય છે ત્યારે હાલમાં એક ઉત્તમ ઉદાહરણરૂપ ઘટના સામે આવી છે. અમદાવાદ રિક્ષા ચાલક યુનિયન દ્વારા આજે એક પ્રમાણિકતાની ઘટના સામે આવી છે. યુનિયન દ્વારા એક એવા રિક્ષા ચાલકનું સન્માન કરવામાં આવ્યું છે કે, જેણે પોતાની પ્રામાણીકતાનું ઉત્તમ ઉદાહરણ સમાજને પૂરું પાડ્યું છે.

અમદાવાદના રિક્ષા ચાલક ચંદ્રેશભાઈ દવે એરપોર્ટ વિસ્તારમાં રિક્ષા ચલાવવાનું કામ કરે છે. એરપોર્ટ પરથી મહુવાના એક વ્યક્તિએ ચંદ્રેશભાઈની રિક્ષા બંધાવી હતી. ચંદ્રેશભાઈ તો પોતાના ગ્રાહકને જે-તે સ્થળ પર લઈ જવા માટે નિકળ્યા તેમજ ગ્રાહકને ડ્રોપ પણ કર્યા હતા.

બન્યું એવું કે, આ વ્યક્તિ પોતાની બેગ રિક્ષામાં જ ભૂલી ગયા હતા. જ્યારે રિક્ષા ચાલક ચંદ્રેશભાઈને ખબર પડી કે, તેમના ગ્રાહક બેગ ભૂલીને જતાં રહ્યા છે ત્યારે તેમની માનવતા સામે આવી હતી. જો રિક્ષા ચાલક ઈચ્છે તો, આ બેગને પોતાની પાસે પણ રાખી શક્યા હોત પણ ચંદ્રેશભાઈ દવે એ લોકોમાં નથી.