ભાજપના ગઢમાં મોટું ગાબડું: એક સાથે 300 લોકોએ મહેશ સવાણીની હાજરીમાં પકડ્યું ઝાડું

ગુજરાત રાજ્યમાં આમ આદમી પાર્ટીની લોકપ્રિયતા સતત વધી રહી છે. આગામી ૨૦૨૨ની વિધાનસભાની ચૂંટણીને લઈને આમ આદમી પાર્ટી લોકોની વચ્ચે જઈને લોકોની વાત સાંભળી રહી છે. આમ આદમી પાર્ટીના પ્રદેશ અધ્યક્ષ ગોપાલ ઈટાળીયા, ઇસુદાન ગઢવી, મહેશ સવાણી અને પ્રવિણ રામ ગામડે ગામડે જઈને લોકોના પ્રશ્નો સાંભળી રહ્યા છે અને ગામડે ગામડે જન સંવેદના મુલાકાત કરી રહ્યા છે.

અલગ અલગ જીલ્લા, તાલુકા અને શહેરના લોકો અને સાથે સામાજિક અગ્રણીઓ તથા અન્ય રાજકીય પક્ષના નેતાઓ આમ આદમી પાર્ટીમાં જોડાઈ રહ્યા છે. ત્યારે હવે સુરતમાં ભારતીય જનતા પાર્ટીના ગઢમાં આમ આદમી પાર્ટીએ પોતાનો ખેલ પાડી દિધો છે. સુરત શહેરના વોર્ડ નંબર ૮ ડભોલી-સિંગણપોર વોર્ડમાં ભાજપના ત્રણ કોર્પોરેટર અને આમ આદમી પાર્ટીના ૧ કોર્પોરેટર ચુંટાઈને વિજયી બન્યા છે. ત્યારે ભારતીય જનતા પાર્ટીના ગઢમાં ગાબડું પડ્યું છે એક સાથે ૩૦૦ લોકોએ આમ આદમી પાર્ટીનો ખેસ પહેર્યો છે.

મળતી માહિતી અનુસાર સુરતની અલગ-અલગ સોસાયટીના લોકોએ હવે ઝાડું પકડ્યું છે અને આમ આદમી પાર્ટીમાં જોડાયા છે. ત્યારે હવે સુરત શહેરના ડભોલી વિસ્તારમાં ઉમરાળા ગામના એક કાર્યક્રમનું આયોજન કરવામાં આવ્યું હતું અને તેમાં હરિદર્શનના ખાડામાં રહેતા ૩૦૦ થી વધુ લોકો આમ આદમી પાર્ટીના નેતા મહેશ સવાણીના હસ્તે આમ આદમી પાર્ટીનો ખેસ ધારણ કર્યો હતો.